چارسال اٹی شونداری ڈٹ آتیٹی بدعنوانی نا اسہ کیس اس ہم مون آ بتنے
اسلام آباد۔ 22 اگست (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) کرپشن آن پاک حکومت نا تصوراس تسنے، درحقیقت ننکن دافخر انا ہیت اسے کہ گدرینگوک آ چارسال اٹی شونداری ڈٹ آتیٹی بدعنوانی نا اسہ کیس اس ہم مون آ بتنے، ساڑی حکومت کانود نا حکمرانی جمہوری تصور آتا بالادستی و ادارہ غاتا سوگوی آ پکا یخین تخک۔ پارلیمنٹ نا باسک آتا مون پہ مون حقی چیلنج گدرینگوک آ چار سال اٹی دوئی مروک آ فائدہ غاتے سوگوی تروئی ئِ۔ اوداہیت ئِ سے شنبے نادے مسلم لیگ (ن) آن تعلق تخوک آ سینیٹر زآتون ہیت وگپ کرسا پارے ہرافک وزیراعظم آفس اٹی اوڑتون اوڑدہی کریر۔ وزیراعظم پارے کہ پاکستان مسلم لیگ (ن) نا حکومت گدرینگوک آ چار سال اٹی ملک ئِ مون تروک چیلنج آتیان کشنگ کن اہم کڑد ادا کرینے، محمد نواز شریف نا سروکی ٹی مسلم لیگ (ن) نا حکومت معیشت آن ہلیس امن و ایمنی نا ابترحالیت آتسکان نا چیلنج آتون گچین وڑاٹ مون ترسا ملک ئِ پدی پٹڑی آ شاغانے و شونداری و شونہالی نا سفر آ روان کرینے۔ وزیراعظم سیکورٹی ، معیشت و شونداری نا بابت چندی پالیسی گام گیج آتیا ہیت وگپ کرسا پارے کہ ساڑی حکومت نا کارکڑد گدرینگوک آ حکومت آتیان گچین ئِ۔ حکومت سخت درکار شونداری ڈٹ آتیا چکارتخا ہرافتیان الس نا گرج آک پورو مسر و داڈٹ آتا بروخت پوروی ئِ المی جوڑ کرے۔ وزیراعظم داہیت آ زورشاغا کہ حکومتی پالیسی تیان جہانی کہول آ ننا مثبت تشخص ہم تالان مس و جہانی برادری خاص کر درملکی زرکارآتا پت بحال مس، پنی جہانی ادارہ غاک دانا اعتراف ئِ ہم کرینو۔ وزیراعظم پارے کہ نن کرپشن آن پاک حکومت نا تصور تسونن و درحقیقت داننا غٹ اکن فخر انا ہیت اسے کہ گدرینگوک آ چارسال اٹی شونداری ڈٹ آتیٹی بدعنوانی نا اسہ کیس اس ہم مون آ بتنے۔ وزیراعظم خاص کر معیشت ، بجلی نابشخ، چندی شونداری ڈٹ آتا بروخت پوروی و داخلی سلامتی ئِ المی جوڑ کننگ نا بشخ آتیٹی دوئی مروک آ سرسہبی تے تالان کرے۔ اوپارے کہ مسلم لیگ (ن) نا حکومت کانود نا حکمرانی جمہوری تصور آتا بالادستی و ادارہ غاتا سوگوی آ پکا یخین تخک۔ وزیراعظم تون اوڑدہی کروک آ سینیٹ نا باسک آتیٹی ایوان بالا ٹی قائد ایوان راجہ ظفرالحق، وزیر موسمیاتی بدلی مشاہد اللہ خان، وزیر انسداد منشیات لیفٹیننٹ جنرل (ر) صلا ح الدین ترمذی، وزیر شماریات کامران مائیکل، وزیراعظم نا خصوصی کمکار آصف سعید کرمانی، چوہدری تنویر ، غوث محمد خان نیازی، مسٹر حمزہ، لیفٹیننٹ جنرل (ر) عبدالقیوم، نثارمحمد، پرویز رشید، سلیم ضیاء، سردار محمد یعقوب خان ناصر ، سعود مجید، آغاشاہ زیب درانی ، محمد جاوید عباسی ، عائشہ رضا فاروق، کلثوم پروین، نجمہ حمید، نزہت صادق و راحیلہ مگسی اوار ئسر۔
