مسلم لیگ (ن) نا حکومت سیاسی وابستگی آن ایڑتر مرسا مچ آ ملک انا الس نا راجی و دودوربیدہ ہی شونداری آ پکا یخین تخک
اسلام آباد۔ 21 اگست (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) نا حکومت سیاسی وابستگی آن ایڑ تر مرسا مچ آ ملک انا الس نا راجی و دودوربیدہ ہی شونداری آ پکا یخین تخک، بنجائی حکومت الس نا زند اٹی آب اٹ بدلی اس اتنگ کن مدام جمہوری اصول آتا مخ تفی ئِ کرینے۔ اوداہیت ئِ خیبر پختونخوا آن صوبائی اسمبلی نا باسک آتا ڈل اتون ہیت وگپ کرساپارے ہراسردار اورنگزیب نلوتھا نا سروکی ٹی دوشنبے نادے وزیراعظم آفس اٹی اوڑتون اوڑدہی کریر۔ داوخت آ ڈپٹی اسپیکر قومی اسمبلی مرتضیٰ جاوید عباسی ، وزیراعظم نا سلاہکار ہوابازی سردار مہتاب عباسی، وزیراعظم نا سلاہکار انجینئر مقام و وزیر انسداد منشیات لیفٹیننٹ جنرل(ر) صلاح الدین ترمذی ئسک ہم ساڑی ئسر۔ اوڑدہی ٹی صوبہ نا جم اٹنگا حالیت ، شونداری ڈٹ و صوبہ نا الس ئِ مون تروک ویل آتیان ہیت وگپ مس۔ ڈل اتون ہیت وگپ کرسا شونداری ڈٹ آتا بارواٹی وزیراعظم پارے کہ بنجائی حکومت صوبائی حکومت آتا کمکاری و خاص کر مرانگا علاقہ غاتا خلقت نا گرج آتے پورو کننگ کن ڈٹ آتا بناءکننگ کن کوشست کننگ ئِ۔ اوپارے کہ مسلم لیگ (ن) نا شونداری ایجنڈا جاری و ساری سلک۔ وزیراعظم ڈل ئِ باوری ترفے کہ بنجائی حکومت اوفتا ویل آتا ایسری کن ہروڑنا کمک فراوان کیک۔ او گچین مروک آ باسک آتیا زورشاغا کہ او الس تون خڑکی رابطہ تخسا اوفتا ویل آتا ایسری ٹی تینا کڑد ئِ ادا کیر۔
