ملک اٹی اقلیت آتا رکھ و غٹ بشخ آتیٹی میرٹ و کچ انا رداٹ اوفتے شونداری نا وارخواہی فراوان کننگ حکومت نا اولیت آتیٹی اوار ئِ ، اقلیت آتا ویل آتے ایسر کننگ کن حکومت ہروڑنا گام گیج چست کیک
ڈل انا وزارت عظمیٰ نا منصب ئِ سنبھالنگ آ پاکستان نا مچ آ مسیحی برادری تا کنڈآن وزیراعظم شاہد خاقان عباسی ئِ مبارکباد
اسلام آباد۔ 21 اگست (اے پی پی) وزیراعظم شاہد خاقان عباسی پارینے کہ ملک اٹی اقلیت آتا رکھ و غٹ بشخ آتیٹی میرٹ و کچ انا رداٹ اوفتے شونداری وارخواہی فراوان کننگ حکومت نا اولیت آتیٹی اوار ئِ ، اقلیت آتا ویل آتے ایسر کننگ کن حکومت ہروڑنا گام گیج چست کیک۔ اوداہیت ئِ پارلیمانی سیکرٹری مذہبی امور خلیل جارج نا سروکی ٹی مسیحی برادری نا ڈل اتون دوشنبے نادے داڑے وزیراعظم آفس اٹی اوڑدہی ٹی پارے۔ ڈل اٹی ایلوفتیان بیدس بشپ عرفان جمیل ، بشپ اشرف جوزف، بشپ ہمفرے سرفراز، پاسٹر ابراہیم دانیال، پاسٹر عمران فضل، سسٹر سوزن سردار و سسٹر مارتھا تاج اوار ئسر۔ بنجائی وزیر شماریات کامران مائیکل ہم اوڑدہی ٹی ساڑی ئس۔ ڈل وزارت عظمیٰ نا منصب ئِ سنبھالنگ آ پاکستان نا مچ آ مسیحی برادری تا کنڈآن وزیراعظم شاہد خاقان عباسی ئِ مبارکبادی تس۔ ڈل پاکستان اٹی جذام نا مریض آتے کن تینا زند ئِ وقف کروک آ آنجہانی ڈاکٹر روتھ فاﺅ نا سرکاری جہہ جاگہ نا پڑو آ وزیراعظم نا منت واری ئِ ہرفسا پاریر کہ حکومت پاکستان ڈاکٹر روتھ فاﺅ ئِ ہراعزت و شرف ئِ تسنے داڑآن پاکستان نا مسیحی برادری ئِ مچ آ ملک اٹی مست آن جاری راجی و انسانی ہمدردی نا خذمت آتے ودفنگ نا حوصلہ ملانے۔ ڈل وزیراعظم ئِ ملک انا چندی بشخ آتیٹی مسیحی برادری ئِ مون تروک مشکل آتیان معلومدار کرے۔ وزیراعظم ملک اٹی اقلیت خاص کر مسیحی برادری نا قابل قدر خذمت آتا ستائِ کرے۔ وزیراعظم پارے کہ اقلیت آتا رکھ و غٹ بشخ آتیٹی میرٹ و کچ انا رداٹ اوفتے شونداری نا وارخواہی فراوان کننگ حکومت نا اولیت آتیٹی اوار ئِ۔ وزیراعظم پارے کہ حکومت ملک اٹی مذہبی ہم آہنگی نا مون آ دننگ کن پرعزم ئِ۔ وزیراعظم پارے کہ اقلیت آتا ویل آتے ایسر کننگ کن حکومت ہروڑنا گام گیج چست کیک۔
