ترکی تون تینا برادرانہ تعلقداری تے بھاز قدرانا نظر اٹ ہرنہ
اسلام آباد۔ 21 اگست (اے پی پی) وزیراعظم شاہد خاقان عباسی پارینے کہ پاکستان نا حکومت و الس ترکی تون تینا برادرانہ تعلقداری تے بھاز قدر انا نظر اٹ ہریرہ ہرا اسیجائی تاریخ، اسہ وڑنا اقدار و تین پہ تینی مفاد آتیاٹی ئُ۔ اوداہیت ئِ پاکستان اٹی ترکی نا سفیر بابر گرگن تون دوشنبے نادے ہیت وگپ کرسا پارے۔ اوڑدہی ٹی پاک ترک تعلقداری تیا خیال آتا درشانی مس۔ ترک سفیر شاہد خاقان عباسی ئِ وزارت عظمیٰ نا منصب ئِ سنبھالنگ آ مبارکبادی تس۔ ترک صدر نا کنڈآن تہنیتی چھٹی اس ہم وزیراعظم ئِ سرکننگا۔ وزیراعظم داہیت آ است جمی نا درشانی ئِ کرے کہ ہڑتوم آ ملک آتا تین پہ تینی تعلقداریک گدرینگوک آ چار سال اٹی پین زیات مسنو۔ اوپارے کہ پاکستان ترکی تون تینا رابطہ خاص کر ہڑتوم آ کنڈآتا اقتصادی کمکاریئِ پین سوگوی تننگ نا خواہندار ئِ۔ وزیراعظم ترکی نا برادرالس و سروک آتے کن نیک است خواہی تا درشانی ئِ کرے۔ ترک سفیر اومیت ظاہر کرے کہ پاک ترک تعلقداری تے پین مون آ دننگک و داٹی ہڑتوم آ ملک آتا نیام اٹ گیشتر کمکاری و اشتراک کارودک۔
