ادارہ سے نا ادارہ سے تون محاذآرائی اف، ننا کاریم حکومت و الس نا خذمت کننگ نا ئِ ، بلوچستان اٹی نواز شریف نا پڑو کروک آغٹ ڈٹ آتیا کاریم ئِ برجا تخنہ
کوئٹہ ۔19اگست (اے پی پی ) وزیر اعظم شاہد خاقان عباسی پارےنے کہ ادارہ سے نا ادارہ سے تون محاذآرائی اف، ننا کاریم حکومت و الس نا خذمت کننگ نا ئِ ، بلوچستان اٹی نواز شریف نا پڑو کروک آغٹ ڈٹ آتیا کاریم ئِ برجا تخنہ، ٹیوب ویل آتے شمسی توانائی آ گدریفنگک، حکومت صوبہ غاتا شونداری فنڈ آتے 1200 روپئی آن ودفسا1900 ارب روپئی کرینے، صوبہ ٹی ساڑی حالیت آک مستین ناحالیت آتیان بھاز گچین ئُ، صوبہ سے تون ناانصافی و تعصب نا ہچ ئُ گنجائش اس اف ، دا خیال آتا درشانی ئِ ہفتہ نا دے گورنر ہاﺅس کوئٹہ ٹی میڈیا تون ہیت و گپ کرسا کرے ،وزیر اعظم پارے کہ بلوچستان نا ہرضلع ٹی گیس نا فراوانی کن محمد نواز شریف نا شونداری ویژن رداٹ جاری اسکیم آ تے ہنداسال پوروکننگک۔ ہرافتیا15 ارب روپئی خڑچ بریک وخت اس کہ ٹیوب ویل آتے سولر سسٹم آ گدریفنگ نا ڈٹ مسہ فیز اٹی پورو کننگک ۔دا ڈٹ آ ہنداسال کاریم بنا ءمریک ، داڈٹ آتا پوروی آن بزغرآتے فائدہ رسینگک و سبسڈی و ایلو گچین مسخت آتے کن کاریم اٹ اتنگک ۔
