کوئٹہ ۔ 19 اگست (اے پی پی ) وزیر اعلیٰ بلوچستان نواب ثنا ءاللہ خان زہری پارینے کہ امن و سوگوی و جاری شونداری عمل نا سوب بلوچستان اٹی پدریسہ بدلی بننگ ئِ و بروک آ منہ سال اٹی اسہ پوسکن ئُ بلوچستان اس نظر بریک ۔داہیت ئِ وزیر اعظم شاہد خاقان عباسی نا کماشی ٹی مروک آ دیوان اٹی خیال آتا درشانی ئِ کرسا پارے، وزیر اعلیٰ پارے کہ مستین اٹی حکمرانک بسورہ و کرسی آ تولساہنساکریرہ، نن گدرینگوک کا چِل سال انا ایسر نا چاروک ویل آتیا چکارتخان و صوبہ ٹی رونما مروک آ مثبت بدلی نا کریڈٹ ساڑی آ صوبائی حکومت ئِ کاہک ، او پارے کہ جاری مالی سال نا شونداری پروگرام اٹی ہندن ئُ ڈٹ پوروکننگک ، ہرافتا براہ راست فائدہ لس بندغ ئِ رسینگک ۔خاص کر جان جوڑی ، تعلیم ،آبنوشی نا بشخ آتا شونداری و روزگار نا وارخواہی تا فراوانی ننا اولیت آتیٹی اوار ئُ ۔وزیر اعلیٰ پارے کہ صوبہ ٹی پسماندگی نا ہنداعالم ئس کہ پہوالی و شاری علاقہ غاتیٹی پرخ سلتویسس وشاری علاقہ غاتیٹی ہم بنداوی آسراتیک ہلورہ، اوپارے کہ وزیر اعلیٰ ڈویژنل و ضلعی شونداری پروگرام نا رداٹ ڈویژنل و ضلعی ہیڈ کوارٹرآتا جوڑ جاڑ کن بھلو فنڈاس تننگانے ۔ ہرافتا کمک اٹ شونداری ڈٹ آک ترندی اٹ برجا ئُ و زوت اس خوشگوار ئُ بدلی اس نظر بننگ بناءکیک۔وزیر اعلیٰ بلوچستان نا غٹ ضلع غاتیٹی گیس انا فراوانی کن وزیر اعظم نا کنڈآن ایل این جی پلانٹ آتا تنصیب ، بے نظیر انکم سپورٹ پروگرام و ہیلتھ انشورنس کارڈ پروگرام نا دنگ ئِ صوبہ نا غٹ ضلع غاتسکان ودفنگ نا پڑوآ وزیر اعظم نا منت واری ئِ ہرفے ، اوپارے کہ مسکوہی وزیر اعظم محمد نواز شریف نا بلوچستان ئِ پبی چکار دوئی ئسک و ننے یخین ئِ کہ وزیر اعظم شاہد خاقان عباسی ہم بلوچستان آن پسماندگی نا چٹفنگ و اودے ایلو صوبہ غاتا بریبر اتنگ کن ننا پبی کمک ئِ کیک۔
