پاکستان و ترکی نا نیام اٹ سوگوسیاسی و اقتصادی تعلقداریک ئُ
اسلام آباد۔ 18 اگست (اے پی پی) بنجائی وزیر واپار محمد پرویز ملک پارینے کہ پاکستان و ترکی نا نیام اٹ سوگو سیاسی و اقتصادی تعلقداریک ئُ، نن سیاسی اقتصادی بشخ آتیٹی گچین تعلقداری تے بریبری ، دیرپا و سوگو تعلقداری تیٹی بایدے بدلیفن ۔ داڑے ترکی نا سفیر بابر گرگن تون ہیت وگپ کرسا اوپارے کہ پاکستان و ترکی نا ہڑتوم آ کنڈآتا سوگو سیاسی و اقتصادی تعلقداریک ئُ و داہڑتوم آ ملک آتا الس نا نیام اٹ تاریخی و جذبانی تعلق ئِ سوگو جوڑکیرہ۔ اوپارے کہ نن سیاسی اقتصادی بشخ آتیٹی گچین تعلقداری تے بریبری، دیرپا و سوگو تعلقداری تیٹی بایدے بدلیفن ۔ داوخت آ سیکرٹری واپار یونس ڈھاگہ صفا کرے کہ ترکی ٹیکسٹائل نا بشخ اٹی ودکی ڈیوٹی عائد کرینے و کشاری مصنوعات آتیا بھلو ہاﺅسنگ فنڈ اس عائد کننگانے اوکان پد پاکستانی منصوعات آک ترکی نا مارکیٹ آتیٹی مسابقت ئِ برقرار تخنگ کتوس۔ سیکرٹری سفیر ئِ دا ہم پارے کہ پاکستان ترکی ئِ ہموگچین واپاری آسراتی تے پیش کننگ نا خواہندار مسنے ہراکہ آزادانہ واپاری معاہدہ تخوک آ ہرپارٹی ئِ تننگانو ۔ وداسہ اومیت ئِ کہ ترکی ہم ہندا نا بدلہ ٹی ہندن کیک۔ سیکرٹری واپار پارے کہ ہڑتوم آ ملک آتا سیاسی سروک آک آزادانہ واپاری معاہدہ کن مذاکرات ئِ زوت آن زوت پورو کننگ نا اسیجائی وڑاٹ درشانی ئِ ہم کرینو۔ پاکستان اٹی ترکی نا سفیر بابر گرگن پوسکن آ وزیر واپار ئِ مبارکبادی تس وپارے کہ پاکستان نا غٹ گڑتی تے تعلقدار کمامدارآتسکان سرکننگک۔ اوداہیت آن ہم اتفاق کریر کہ ہڑتوم آ ملک آتا ایلمی آ مبنی تعلقداری تا عکاسی ہڑتوم آ ملک آتا ہڑتوم آ کنڈآتا بایدے واپار اٹی ہم مرے۔
