مسلم لیگ (ن) نا حکومت السی ویل آتا ایسری کن است انا ھب اٹ کاریم کننگ ئِ
اسلام آباد۔ 18 اگست (اے پی پی) وزیراعظم شاہد خاقان عباسی پارینے کہ پاکستان مسلم لیگ (ن) نا حکومت الس نا خذمت آ پکا یخین تخک و السی ویل آتا ایسری کن است انا ھب اٹ کاریم کننگ ئِ۔ اوداہیت ئِ ڈیرہ غازی خان آن تعلق تخوک آ مسلم لیگ (ن) نا قومی اسمبلی نا باسک آتون ہیت وگپ کرسا پارے ہراک جمعہ نا دے داڑے اوڑتون اوڑدہی کریر۔ قومی اسمبلی نا باسک آک وزیراعظم ئِ تینا حلقہ غاتا شونداری اسکیم تا بارواٹ معلومدار کریر۔ وزیراعظم پارے کہ حکومت سویلی پنجاپ نا شونداری آ چکار تخنگ ئِ و شونداری اسکیم تے کن ہروڑاٹ زیات آن زیات وسیلہ جتا کننگک۔ اووزارت خزانہ ئِ پارت کرے کہ علاقہ نا شونداری ڈٹ آتے کن تخوک آ غٹ فنڈ آتے ترند تر بنداو تیا فراوان کننگے۔ اوپارے کہ او ڈی جی خان نا شونداری نا بابت ہرویل انا ایسری کن مدام دستیاب مریک۔ او قومی اسمبلی نا باسک آتیا زورشاغا کہ او گچین ئُ بدلی اس اتنگ کن خواری اٹ کاریم کیر۔ وزیراعظم تون اوڑدہی کروک آتیٹی بنجائی وزیر سردار اویس احمد خان لغاری ، وزیر مملکت مواصلات حافظ عبدالکریم ، قومی اسمبلی نا باسک سردار محمد امجد فاروق کھوسہ، سردارمحمد جعفرخان لغاری، حفیظ الرحمان دریشک ، ملک سلطان محمد ہنجرا، سردار عاشق حسین گوپانگ، صاحبزادہ فیض الحسن، سید محمد ثقلین شاہ بخاری و مسز شہباز سلیم ملک اوار ئسر۔ اوڑدہی ٹی پارلیمانی امور نا وزیر شیخ آفتاب احمد و وزیر مملکت اطلاعات و نشریات مریم اورنگزیب ئسک ہم ساڑی ئسر۔
