اسلام آباد۔ 17 اگست (اے پی پی) صدر مملکت ممنون حسین پارینے کہ حکومت پولیو نا چٹفنگ کن شاندار کارکڑد نا درشانی ئِ کرینے ہراٹی داسال پولیو نا بیرہ مسہ واقعہ مون آ بسنے، انسداد پولیو مہم نا سرسہبی نا دارفتار نا پیش نظر سوگواومیت ئِ کہ پاکستان آن دامرض زوت چٹک۔ صدر مملکت داہیت ئِ روٹری فاﺅنڈیشن نا سروک کلیان بینرجی تون ہیت وگپ کرسا پارے۔ داوخت آ فاﺅنڈیشن نا سینئر باسک عزیز میمن، پنجاپ چیپٹر نا گورنر مسز فائزہ قمر و سندھ بلوچستان چیپٹر نا گورنر اویس کوہاری و حکومت پاکستان نا انسداد پولیو ایمرجنسی آپریشن سیل انا سروک ڈاکٹر رانا صفدر تون اوار ایلوبڑزکو کمامدارآک ہم ساڑی ئسر۔ صدر مملکت پارے کہ پولیو نا تالان مننگ نا اسہ بھلا سوب عسکریت پسندی ئس ہرانا بھلو حد اسسکان مون ئِ توننگانے داٹی اومیت ئِ کہ ملک آن دامرض پوروی وڑاٹ چٹک۔ صدر مملکت پارے کہ حکومت پولیو نا چٹفنگ کن یکسو ئِ و دانا چٹفنگ کن پبی خواری کننگ ئِ ہرانا نتیجہ غاک مون آ بننگ ئُ۔ اوپارے کہ داوڑنا مرض آتا تالان مننگ نا اسہ سوب بے تعلیمی و حفظان جان جوڑی نا اصول آتیان نابلد ہم ارے۔ داچرجوئی ٹی حکومت اسہ جامع ئُ ڈٹ اسے آ کاریم کننگ ئِ ہرانا رداٹ پرائمری تعلیم پورو وڑاٹ زالبول نا حوالہ کننگک ہراڑآن زالبول ناخواندگی نا کچ اٹی ودکی آن بیدس جان جوڑی نا بارواٹی ہم شعور ودی مریک و راج آن چندی مرض آتا چٹفنگ اٹی کمک رسینگک۔ داوخت آ روٹری فاﺅنڈیشن نا سروک کلیان بینرجی پولیو نا چٹفنگ نا چرجوئی ٹی تینا کوشست آتیان صدر مملکت ئِ معلومدار کرے و پارے کہ انسداد پولیو نا چرجوئی ٹی فاﺅنڈیشن حکومت پاکستان تون کمک ئِ برجاتخک۔ اوپولیو نا برخلاف سرسہب مہم نا چرجوئی ٹی بنجائی وزیر سائرہ افضل تارڑ و وزیراعظم نا کوآرڈینیٹر سارارضافاروق نا خذمت آتاہم ستائِ کرے۔
