کشمیریک تینٹ بھارت نا ریاستی دہشت گردی نا گواچی ئُ، حزب المجاہدین ئِ دہشت گرد گوندنگ نا امریکی فیصلہ غا مایوسی مس
اسلام آباد۔ 17 اگست (اے پی پی) پاکستان پارینے کہ کشمیریک تینٹ بھارت نا ریاستی دہشت گردی نا گواچی ئُ حزب المجاہدین ئِ دہشت گرد تنظیم اس گوندنگ نا امریکی فیصلہ غا مایوسی مسنے، تنظیم ئِ دہشت گرد گوندنگ بے تک ئِ، کشمیری الس گدرینگوک آ کہی دہائی آن حق خودارادیت کن جہد کننگ ئُ۔ پاکستان بھارت ہمسایہ ملک ئُ ہڑتوم آتے ڈیہہ نا سلامتی و سوگوی کن تین پہ تینی جھیڑہ غاتے مذاکرات نا کمک اٹ ایسر کروئی مریک۔ کوئٹہ دھماکہ ٹی بھارت نا اوار مننگ نا بارواٹی گڑاس پاننگ وخت آن مست مریک۔ پنچ شنبے نادے ہفتہ وار پریس بریفنگ اٹی دفترخارجہ نا ترجمان محمد نفیس زکریا پارے کہ حزب المجاہدین ئِ دہشت گرد گوندنگ نا امریکی فیصلہ غا مایوسی مسنے ، مقبوضہ کشمیر نا الس گدرینگوک آ کیہی دہائی تیان بھارتی فورس آتا ظلم و بیداد نا گواچی ئُ۔ کشمیریک تینا حق خودارادیت نا دوئی کن روا جہد کننگ ئُ وخت اس کہ کشمیریک تینٹ بھارتی ریاستی دہشت گردی نا گواچی ئُ۔ دانا برعکس انسانی حق انا پدریسہ خلاف ورزی و بے گناہ کشمیری تے ظلم و بربریت نا نشانہ جوڑ کننگ آ بایدے بھارت ئِ دہشت گرد گوندنگے۔ ترجمان بھارتی وزیراعظم نریندر مودی نا ساڑی آ بیان آ تران کرسا پارے کہ بھارتی وزیراعظم نا بیان پاکستانی موقف نا تائید ئِ۔ پاکستان مست آن پارسا کرینے کہ ہمسایہ ملک آتے ڈیہہ ٹی امن و سوگوی کن کشمیر تون اوار تین پہ تینی جھیڑہ غاتے مذاکرات نا کمک اٹ ایسر کروئی مریک۔ اوپارے کہ کشمیر نا ویل ہڑتوم آ ملک آتا نیام اٹ بنداوی جھیڑہ ئِ۔ اوغانستان نابابت اسہ سوج اسے نا ورندی ئِ ترسا ترجمان پارے کہ اوغان ویل انا ہچ ئُ فوجی ایسری اس اف ساڑی ہی ٹی پاکستان و اوغانستان نا نیام اٹ سیاسی سلابتی دیوان اٹی اقتصادی ، سیاسی ، بارڈر مینجمنٹ ، ٹرانزٹ و اوغان باہوٹ آتا عزت اٹ پدی گدریفنگ تون اوار چندی معاملہ غاتیا خیال آتا درشانی ئِ کننگا۔ ہڑتوم آ ملک آک دہشت گردی نا اسیجائی خلیس آتا مون ئِ توننگ کن ادارہ جاتی کہول آ کمکاری آ امنا کریر۔ کوئٹہ دھماکہ ٹی بھارتی دُو انا بابت اسہ سوج اسے نا ورندی ئِ ترساترجمان پارے کہ داچرجوئی ٹی گڑاس پاننگ وخت آن مست مریک ولے کلبھوشن یادیو نا امنائی بیان تے مون آ تخسا بھارت پاکستان اٹی تخریبی سرجز و دہشت گرد آتا مالی کمکاری ٹی اوار ئِ۔ کلبھوشن بلوچستان اٹی رانا سرجزو بی ایل اے تون رابطہ غاتے امنا کرینے۔ ترجمان پارے کہ پاکستان ملک بھارتی تخریبی سرجزآتا بابت ڈوزیئر اقوام متحدہ ئِ پیش کرینے و دامعاملہ ئِ ہرفورم آ چست کرینے۔ ترجمان پارے کہ پاکستان دہشت گردی نا برخلاف جنگ اٹی بے پناہ جانی و مالی قربانی تسنے وخت اس کہ امریکہ مدام پاکستان نا قربانی تا ستائِ کرینے۔ امریکہ وار وار پارینے کہ او پاکستان تون تینا تعلقداری تے بھاز اہمیت ایتک، امریکہ تون کمکاری نا مون آ دننگ کن 6 ورکنگ گروپس کاریم کننگ ئُ۔ ترجمان نیپال اٹی مغوی کرنل (ر) حبیب ظاہر نا بابت اسہ سوج اسے نا ورندی ئِ ترسا پارے کہ اونا بحفاظت بازیابی کن کوشست آک جاری ئُ۔
