اسلام آباد ۔ 17 اگست (اے پی پی) وزیراعظم شاہد خاقان عباسی 4سلاہکار و 5 خصوصی کمکار آتے زمواری تے تس، سلاہکارآ تا عہدہ بنجائی وزیر وخت اس کہ خصوصی کمکار آتا عہدہ وزیر مملکت نا بریبر مریک۔ پنچ شنبے نادے ایوان وزیراعظم نا کنڈآن جاری پڑو نا رداٹ وزیراعظم پن کروک چار سلاہکار تے زمواری تے تس، انجینئر امیر مقام ئِ سیاسی معاملہ غاتا بارواٹی سلاہکار پن کننگانے۔ عرفان صدیقی قومی تاریخ و ادبی میرات بارواٹی نا سلاہکار مریک۔ جام معشوق علی ارساامور نا بارواٹی سلاہکار مریک وخت اس کہ سردار مہتاب احمد خان ہوابازی نا بارواٹی وزیراعظم نا سلاہکار مریک۔ وزیراعظم نا کنڈآن پن کروک پنچ خصوصی کمکار آتے ہم زمواری تننگانے، ڈاکٹر سید آصف سعید کرمانی سیاسی امور نا بارواٹی وزیراعظم نا خصوصی کمکار مریک۔ مفتاح اسماعیل اقتصادی امور نا بارواٹی وزیر اعظم نا خصوصی کمکار مریک و ڈاکٹر مصدق ملک میڈیا امور نا بارواٹی خصوصی کمکار مریک۔ ظفراللہ خان کانود نا بارواٹی خصوصی کمکار مریک وخت اس کہ خواجہ ظہیر احمد ادارہ جاتی اصلاحات آتا بارواٹی وزیراعظم نا خصوصی کمکار مریک۔
