حکومت سویلی پنجاپ نا شونداری آ چکارتخنگ ئِ، قومی اسمبلی نا باسک آک تینا تینا حلقہ غاتیٹی الس نا ویل آتا ایسری کن پوروجوزہ و جوش اتون کاریم کیر
اسلام آباد۔ 17 اگست (اے پی پی) وزیراعظم شاہد خاقان عباسی پارینے کہ حکومت سویلی پنجاپ نا شونداری آ چکارتخنگ ئِ ، مسلم لیگ (ن) السی خذمت کن پرعزم ئِ ہنداخاطران قومی اسمبلی نا باسک آک تینا تینا حلقہ غاتیٹی الس نا ویل آتا ایسری کن پورو جوزہ و جوش اتون کاریم کیر۔ اوداہیت ئِ بہاولپور ڈویژن آن تعلق تخوک آ مسلم لیگ (ن) نااسمبلی نا باسک آتا ڈل اتون ہیت وگپ کرسا پارے ہراک پنچ شنبے نادے داڑے اوڑتون اوڑدہی کریر۔ وزیراعظم آفس نا کنڈآن جاری بیان نا رداٹ قومی اسمبلی نا باسک آک وزیراعظم ئِ تینا تینا حلقہ غاتا شونداری ڈٹ آتا بارواٹی معلومدار کریر۔ وزیراعظم پارے کہ حکومت سویلی پنجاپ نا شونداری آ چکارتخانے۔ اووزیراعظم آفس ئِ پارت کرے کہ او ایس ڈی جی فنڈ آن خاص کر بجلی و گیس انا اسکیم و خاص کر علاقہ نا ایلو ڈٹ آتے کن دمدستی وڑاٹ فنڈجاری کے۔ وزیراعظم پارے کہ او شونداری ڈٹ آتا جندی وڑاٹ چاروکی ئِ کیک و علاقہ نا قومی اسمبلی نا باسک آک السی غاو تا ایسری کن اوڑتون ہروخت رابطہ کننگ کیرہ۔ وزیر بین الصوبائی رابطہ ریاض حسین پیرزادہ ، وزیر مملکت صنعت وپیداوار ارشد خان لغاری، قومی اسمبلی نا باسک مخدوم سید علی حسن گیلانی، سید محمد اصغر ، طاہر بشیر چیمہ، شیخ فیاض الدین، مخدوم خسروبختیار، میاں امتیاز احمد، گودی زیب جعفر، مائزہ حمید و مسز صبیحہ نذیر ہم داوخت آ ساڑی ئسر۔ وزیر پارلیمانی امور شیخ آفتاب احمد ہم اوڑدہی ٹی ساڑی ئس۔
