اسلام آباد۔16 اگست (اے پی پی) وزیر اعظم شاہد خاقان عباسی پارینے کہ حکومت کاروباری برادری نا آسراتی کن اہم پالیسی اصلاحات آتا بنائِ کرینے وخت اس کہ قومی معیشت نا ٹک آک سوگوئُ، اوداہیت ئِ پاکستان بزنس کونسل نا ڈل اتون ہیت وگپ کرسا پارے ہراچارشنبے نادے وائس چیئرمین توفیق چنائے نا سروکی ٹی اوڑتون اوڑدہی کریر۔ وزیر اعظم پارے کہ منقسم منافع نا منتقلی و سرمایہ نا نقل و حرکت نا پورو آجوئی تون ملک اٹی زرکاری ئِ دانگ اتنگ کن خصوصی اقتصادی علاقہ غاتا اڈ تننگ نا بابت کانود اس جوڑ کننگانے۔اوپارے کہ حکومت نا سیکورٹی نا حالیت خاص کرکراچی ٹی امن و ایمنی نا حالیت ئِ گچین جوڑ کرینوہراڑآن پرامن چاگڑد اٹی کاروباری برادری کن واپار اٹی آسانی مریک ۔او پارے کہ پاکستان نا معیشت نا ٹک آک سوگو ئُ و مثبت نمو نا کنڈآہِننگ ئِ ہرانا اعتراف ئِ مشہور جہانی ریٹنگ ادارہ غاک ہم کرینو۔وزیر اعظم پارے کہ پاکستان علاقائی معیشت اٹی اسہ اہم ئُ کڑداس جوڑ مننگ کن تیار ئِ ، او اہم پالیسی معاملہ غاتیا حکومت ئِ ٹھوس مشورہ فراوان کننگ اٹی پاکستان بزنس کونسل نا کڑد انا ستائِ کرے ۔پاکستان بزنس کونسل نا ڈل وزیر اعظم نا منت وار ئِ ہرفسا زرکارآتا پت نا بحالی و پائیدار کاروباری و واپاری نمو نا کسر ئِ صاف کننگ کن ساڑی حکومت نا پالیسی گام گیج آتا ستائِ کرے۔
