اسلا م آباد۔16 اگست (اے پی پی) قومی سلامتی نا کمیٹی کنٹرول لین آبھارتی فوج انا کنڈآن پدریسہ سیم پارآسم کاری ناواقعہ غا تیا گڑتی نا درشانی ئِ کرسادا عزم انا اعادہ ئِ کرے کہ جموں و کشمیر نا متکن آ جھیڑہ تون اوار اوارغٹ ایسر نا چاری ویل آتا ایسری آن بیدس علاقائی امن و شونداری ممکن اف۔ قومی سلامتی کمیٹی (این ایس سی ) نا دیوان چارشنبے نادے داڑے وزیر اعظم شاہد خاقان عباسی نا کماشی ٹی اڈ ہلک،دیوان اٹی تہہ و پیشن نا سلامتی نا حالیت و جہانی رداٹ پاکستان نا خارجہ پالیسی تا گرج آتا جاچ ئِ ہلنگا۔ دیوان نا ساڑی مروک آک اوغانستان اٹی امن و سوگوی کن اوغان تیا تالان و اوفتا سروکی ٹی امن عمل نا مخ تفی نا عزم انا اعادہ کرسا اوغانستان نا الس و حکومت تون غٹ کہول آتیا اواری اٹ غٹ اڑاند بشمول پدریسہ سیم پارآسم کاری و اوغانستان و پاکستان اٹی دہشت گردی نا واقعہ غاتیٹی اوار نیٹ ورک آتا چٹفنگ نا عزم ئِ کریر۔قومی سلامتی نا کمیٹی کنٹرول لین آ بھارتی فوج انا کنڈآن پدریسہ سیم پارسم کاری نا واقعہ غاتیا گڑتی نا درشانی ئِ کریرو بھارتی فورس آتا کنڈآن مقبوضہ جموں وکشمیر اٹی انسانی حق آتاسنگین پامالی و کودک کشمیری تیا بیدادی نا ترندی اٹ مذمت ئِ کریر۔دیوان نا ساڑی مروک آک دا عزم ا نا اعادہ ئِ کریر کہ علاقائی امن و شونداری ہمووخت اسکان ممکن اف ہراوخت اسکان جموںوکشمیر نا متکن آ جھیڑہ تون اوار غٹ ایسر نا چاری ویل آتا ایسری ئِ کشنگپک ، قومی سلامتی نا کمیٹی امنائی اٹ آپریشن ردالفساد و آپریشن خیبر فور تون اوار انسداد دہشت گردی نا غٹ آپریشن تیٹی دوئی مروک آسرسہبی تیا است جمی نا درشانی ئِ کریر و دہشت گرد عنصر آتا آخریکو نشان ئِ مٹائفنگ اسکان آپریشن ئِ برجاتخنگ نا عزم ظاہر کریر ۔ کمیٹی ملک انا 70 می آجوئی دے ئِ قومی جوش و جوزہ ،سیوت و شاندار وڑاٹ اڈتننگ نا ستائِ کرے ۔ دیوان اٹی وزیر دفاع انجینئر خرم دستگیر خان ، وزیر خزانہ محمد اسحاق ڈار ، وزیر خارجہ خواجہ محمد آصف، چیئرمین جوائنٹ چیفس آف سٹاف کمیٹی جنرل زبیر محمود حیات، چیف آف آرمی سٹاف جنرل قمر جاوید باجوہ، چیف آف نیول سٹاف ایڈمرل محمد ذکاءاللہ، پاک فضائیہ نا سروک ایئر چیف مارشل سہیل امان، قومی سلامتی نا سلاہکار لیفٹیننٹ جنرل (ر) ناصر خان جنجوعہ، ڈائریکٹر جنرل آئی ایس آئی لیفٹیننٹ جنرل نوید مختار و سینئرسول و عسکری کمامدارآک ساڑی ئسر۔
