پاک چین اقتصادی راہداری منصوبگ ئِ سر ئَ دیمروئی کار دل یکیمی اَنت، اے منصوبگ چین ئِ صدرشی جن پنگ ئِ ون بیلٹ ون روڈ پروگرام ئِ بھر اِت ئُُ دوئیں ملک آنی راجدپتری دوستی ئِ دور ور اِت
اسلام آباد ۔ 16 اگست (اے پی پی) چین ئَ پاکستان ئِ سفیرمسعود خالد ئَ چین پاکستان اقتصادی راہداری ئِ منصوبگ آنی سر ئَ دیمروئی کار آنی بابت ئَ دل یکیمی ئِ درشان کتگ۔ چینی میڈیا ئَ را گلگدار دیان ئَ آئی ئَ گوشت کہ دوئیں ھمساگ ئُُ دوستیں ملک آنی نیام ئَ ھاٹیگ، بنیاتی کوکا ئُُ صنعتی آباتی ئِ مچ کنگ ئِ شوبگ ئَ کمک ود اِتگ۔ آئی ئَ گوشت کہ 2015ئِ سی پیک منصوبگ ئِ سسرئَ کار ئِ بندات ئَ تاں بگر انوگ ئَ تاں کار دل یکیمی رنگ ئَ بوھگ ئَ اِنت۔ دوئیں ملک آں توان، ھاٹیگ، بنیاتی کوکا، جوڑیشت، دِکہ ئِ دیمروئی ئُُ صنعتی بُنجاھ جوڑ کنگ ئِ شوبگ ئَ کمک ئَ را ودینتگ ایشی ئَ سبب ئَ جوانیں آسر دیم ئَ آیگ ئَ اَنت۔ آئی ئَ گوشت کہ سی پیک منصوبگ ئَ چہ دوئیں ملک یک ئِ دومیگ ئِ گوما گیش نزیک ئَ اتکگ انت ئُُ آیکویں روچ آں ایشی ئَ نپ ئُُ سیت ئَ دوئیں ملک آنی اُلس ئَ را رس انت۔ آئی ئَ گوشت کہ سی پیک چین ئِ صدرشی جن پنگ ئِ ون بیلٹ ون روڈ پروگرام ئِ المی ایں بھر اِت ئُُ پاک چین ئِ راجدپتری درور اِت۔ آئی ئَ گوشت کہ گوستگیں سے سال آنی تہئَ پاکستان ئَ بازیں شوبگ آنی تہ ئَ دیمروئی بوتگ، ایمنی ئِ جاور ھال آنی تہئَ مزنیں کساس ئَ گہتری اتکگ، معیشیت ئَ را دیمروئی رسگ ئَ اِنت وھدیکہ ھاٹیگ ئِ کمیگ ئَ را گر ئُُ دار کنگ ئِ ھاترا گامگیج یک شل ئَ جاڑی اِنت۔
