اسلام آباد۔ 16 اگست (اے پی پی) چین اٹی پاکستان نا سفیر مسعود خالد چین پاکستان اقتصادی راہداری نا ڈٹ آتیٹی پیش رفت آ است جمی نا درشانی ئِ کرینے۔ چینی میڈیا ئِ انٹرویو ترسا اوپارے کہ ہڑتوم آ ہمسایہ و سنگت ملک آتا نیام اٹ توانائی، بنداوی ڈھانچہ و صنعتی بستی اڈتننگ نا بشخ اٹی کمکاری ئِ مون آ دننگانے۔ اوپارے کہ 2015ءٹی سی پیک ڈٹ آتیا عملدرآمد نا بناءآن ہلیس داوخت اسکان پیش رفت است جمی نا لائق ئِ ۔ ہڑتوم آ ملک آک بجلی ، توانائی ، بنداوی ڈھانچہ، تعمیرات، بندرگاہ تا شونداری و صنعتی زون اڈتننگ نا بشخ آتیٹی کمکاری ئِ مون آ درینو ہرانا مثبت زئم مون آ بننگ ئِ۔ اوپارے کہ سی پیک ڈٹ آتیان ہڑتوم آ ملک آک اسہ ایلو نا پین خڑک بسنو و بروک آ دے تیٹی دانا فائدہ غاتیان ہڑتوم آملک آتا الس ئِ فائدہ رسینگک۔ اوپارے کہ سی پیک چین نا صدر شی جن پنگ نا ون بیلٹ ون روڈ پروگرام نا اہم ئُ بشخ اس و پاک چین تاریخی سنگتی نا شاندار مظہر ئِ۔ اوپارے کہ گدرینگوک آ مسہ سال اٹی پاکستان چندی بشخ آتیٹی پیش رفت کرینے، امن و ایمنی نا حالیت آتیٹی نمان گچینی بسنے۔ معیشت ئِ مون آ دننگ انگ ئِ وخت اس کہ توانائی نا کاختی نا مون ئِ توننگ کن گام گیج آک پدریسہ جاریئُ۔
