اسلام آباد۔ 16 اگست (اے پی پی) صدر مملکت ممنون حسین پارینے کہ پاکستان متحدہ عرب امارات تون تینا تعلقداری تے بھاز اہمیت ایتک ، شیخ زید بن سلطان النہیان نا میرات ئِ پین مون آ دننگ نا گرج ئِ ۔ اوداہیت ئِ متحدہ امارات نا سبکدوش مروک آ سفیر عیسیٰ عبداللہ الباشاالنعیمی تون ہیت وگپ کرسا پارے ہراچارشنبے نادے ایوان صدر اٹی اوڑتون اوڑدہی کرے۔ صدر مملکت پارے کہ پاکستان داڈیہہ ٹی دہشت گردی نا غٹ آن بھلا ہدف ئس ولے اللہ تعالیٰ نا فضل و کرم اٹ دانا بھلو حد اسسکان مون ئِ توننگانے۔ زوت اس دافتنہ ئِ پورو ی اٹ چٹفنگک۔ اوکان پد ملک اٹی اقتصادی سرجزآتا رفتار ترند مریک۔ صدر مملکت پارے کہ پاک ۔امارات تعلقداریک امارات نا بانی شیخ زید بن سلطان النہیان نا شاندار میرات آک ئُ ہراڑآن راہشونی ہلسا داٹی پین ودکی نا گرج ئِ۔ اوپارے کہ شیخ زید بن سلطان النہیان پاکستان نا عظیم ئُ سنگت اس ئس ، کنے خوشی ئِ کہ اونا جانشین ہم اونا گام تیا گام تخسا ہڑتوم آ برادر ملک آتا نیام اٹ پین خڑکی و گرم جوشی ودی کننگ ئِ۔ اوسبکدوش مروک آ سفیر نا خذمت آتا ستائِ کرسا پارے کہ ہڑتوم آ ملک آتا نیام اٹ تعلقداری تیٹی پین کڑمبی ودی کننگ کن شاندار خذمت انجام ایتے ، او اومیت کیک کہ اونا جانشین ہم ہمووڑوڈول آتیا کاریم کیک۔ اوپارے کہ او امارات نا سروک اسکان اونا خیرسگالی و نیک است خواہی ناکلہو ئِ سرکے۔ صدر مملکت پارے کہ ہڑتوم آ ملک آتا نیام اٹ چندی بشخ آتیٹی شاندار کمکاری مننگ ئِ ہراٹی پین ودکی کننگ ناگرج ئِ تانکہ ہڑتوم آ ملک آک اسہ ایلو نا لائخی ومہارت آتیان فائدہ ہرفنگ کیر۔
