فاٹا ئَ جوڑیشی مٹی حکومت ئِ ترجیح اِنت، توامیں چاگردی شوبگ آنی تہ ئَ فاٹا ئِ نندوکیں مردم آں گوں یک ئُُ دگر ئَ ھمکچیں سلوک ئَ را دل یکیم کنگ بیت
اسلام آباد ۔ 15 اگست (اے پی پی) مزن وزیر شاہد خاقان عباسی ئَ گوشت کہ بُنجاھ ئِ چیر دستی قبائلی دمگ (فاٹا) ئَ جوڑیشتی مٹّی حکومت ئِ ترجی اِنتئُُ ما فاٹا ئَ را ایندگہ بُنجاھی بُن ھشت آنی رد ئَ آرگ ئِ واھشت مند آں، توامیں چاگردی شوبگ آنی تہ ئَ فاٹا ئِ نندوکیں مردم آناں یک ئُُ دگر ئَ ھمکچیں سلوک ئَ را دل یکیم کناں۔ آئی ئَ اے گپ فاٹا ئَ گوں سیادی داروکیں سینیٹ ئِ باسک آں گوں تران کنان ئَ گوشت۔ سئے شمبے ئَ مزن وزیر کارگس ئَ آئی ئَ گوں گند ئُُ نند کنوکیں سینیٹرز ئِ تہ ئَ ہدایت اللہ، حاجی مومن خان آفریدی ، اورنگزیب خان ، ہلال الرحمٰن، سجاد حسین طوری، محمد صالح شاہ ، تاج محمد آفریدی ئُُ ملک نجم الحسن ھوار اتنت۔ فاٹا ئِ سینیٹرز آں مزن وزیر شاہد خاقان عباسی ئَ را مزن وزیر ئِ سیٹ ئِ سر ئَ نند گ ئِ پد ئَ مبارکی دات۔ آئی ئَ گوشت کہ ناشرکاری ئَ اے دمگ آنی تہ ئَ دیمروئی ئَ را مزنیں کچ ئَ آماچ کتگ ئُُ بنیاتی کوکا ئَ را سک باز تاوان رستگ۔ مزن وزیر ئَ گوشت کہ فاٹا ئَ مٹی ئِ سک باز ضلورت اِنت۔ آئی ئَ گوشت کہ مٹی مئے حکومت ئِ ترجی اِنت ئُُ ما فاٹا ئَ را ایندگہ بُنجاھی بُن ھشت آنی رد ئَ آرگ لوٹاں۔ استیں حکومت ئِ نیمگ ئَ بندات ئَ اے رد ئَ گامگیج زورگ بوتگ ئُُ شریکدار آنی شور ئُُ سلاھ ئَ چہ کانودی رد ئَ فاٹا ئِ کار آنی تہ ئَ جوڑیشتی مٹیّ ئَ را ترجی دیگ ئَ آں۔ مزن وزیر ئَ گوشت کہ جان سلامتی، وانگ ئُُ زانگ ، بنیاتی کوکا ئُُ چاگردی شوبگ آنی گہتریئِ ھاترا فاٹا ئِ واستہ گیشیں آستراتی نامینگ بنت۔ مزن وزیر ئَ گوشت کہ آ زوت فاٹا ئِ تر ئُُ تاب ئَ کنت۔
