فاٹا ٹی جوڑجاڑی بدلی حکومت نا اولیت ئِ، غٹ راجی بشخ آتیٹی فاٹا نا ہنکینی تے اسہ وڑاٹ ہُننگ ئِ المی جوڑ کننگک
اسلام آباد۔ 15اگست (اے پی پی) وزیراعظم شاہد خاقان عباسی پارینے کہ بنجاءنا بست و بند اٹی قبائلی علاقہ (فاٹا)ٹی جوڑ جاڑی بدلی حکومت نا اولیت ئِ و نن فاٹا ئِ ایلو بنجائی اکائی تا بریبر اتنگ نا خواہندار اُن، غٹ راجی بشخ آتیٹی فاٹا نا ہنکینی تے اسہ وڑاٹ ہُننگ ئِ المی جوڑ کننگک۔ اوداہیت ئِ فاٹا آن تعلق تخوک آ سینیٹ نا باسک آتون ہیت وگپ کرسا پارے۔ سے شنبے نادے وزیراعظم آفس اٹی اوڑتون اوڑدہی کروک آ سینیٹر آتیٹی ہدایت اللہ ، حاجی مومن خان آفریدی، اورنگزیب خان ، ہلا ل الرحمان ، سجاد حسین طوری، محمد صالح شاہ، تاج محمد آفریدی و ملک نجم الحسن اوار ئسر۔ فاٹا نا سینٹرآک وزیراعظم شاہد خاقان عباسی ئِ وزارت عظمیٰ نا منصب ئِ سنبھالنگ آمبارکبادی تسر۔ اوپاریر کہ دہشت گردی اوفتا علاقہ غاتیٹی شونداری نا کچ ئِ بھاز بے وڑ زہمی کرے و بنداوی ڈھانچہ ئِ بھاز نسخان رسینگا۔ وزیر اعظم پارے کہ فاٹا ٹی بدلی سخت المی ئِ۔ اوپارے کہ بدلی ننا حکومت نا اولیت ئِ و نن فاٹا ئِ ایلو بنجائی اکائی تا بریبر اتنگ خوانہ۔ ساڑی حکومت نا کنڈآن مہالوآن دارداٹ گام گیج چست کننگانے و کڑدہ غاتا صلابت آن کانودی اصلاحات تون اوار اوار فاٹا نا معاملہ غاتیٹی جوڑ جاڑی بدلی ئِ اولیت تننگ انگ ئِ۔ وزیراعظم پارے کہ جان جوڑی ، تعلیم، بنداوی ڈھانچہ و راجی بشخ آتیٹی گچینی کن فاٹا کن ودکی وسیلہ جتا کننگک۔ وزیراعظم پارے کہ او زوت فاٹا نا دورہ ئِ ہم کیک۔
