اسلام آباد۔ 15 اگست (اے پی پی) وزیراعظم شاہد خاقان عباسی پولیو نا چٹفنگ نا بارواٹی قومی ٹاسک فورس انا دیوان ئِ دمدستی وڑاٹ بٹنگ انگ نا پارت کرینے۔ سے شنبے ناد ے وزیراعظم آفس اٹی بڑزکو کہول انا دیوان اسے نا کماشی ئِ کرسا وزیراعظم پارے کہ سیاسی سروک ملک آن پولیو نا چٹفنگ کن است انا ھب اٹ پرعزم ئِ۔ داننا بروک آ نسل آتا بقاءنا معاملہ ئِ ہنداخاطران نن ملک آن پولیو نا چٹفنگ نا پبی زمواری ئِ ہلینہ۔ وزیراعظم پارے کہ او دا معاملہ نا جندی وڑاٹ چاروکی ئِ کیک۔ پولیو نا چٹفنگ صوبائی حکومت، کانود نافذ کروک آ ادارہ، ضلعی انتظامیہ، سول سوسائٹی و جہانی ڈونرز آتا کنڈآن سوگو کوشست آتا متقاضی ئِ۔ اوپولیو نا وائرس ئِ نمان وڑاٹ توننگ کن وزارت قومی جان جوڑی خذمت و پولیو نا چٹفنگ نا قومی پروگرام نا کنڈآن پیش رفت آ است جمی نا درشانی ئِ کرے۔ دیوان اٹی وزیر قومی جان جوڑی خذمت سائرہ افضل تارڑ و پولیو نا چٹفنگ نا قومی پروگرام نا چیئرپرسن عائشہ رضا فاروق وزیراعظم ئِ پولیو نا چٹفنگ نا بابت پیش رفت آن معلومدار کریر ۔
