اسلام آباد۔ 14اگست (اے پی پی) وزیر مملکت کیڈ ڈاکٹر طارق فضل چوہدری پارینے کہ 70 سال اٹی پاکستان اسلامی ملک آتیٹی نمان ہند اس دوئی کرے و پاکستان اسٹ انگا ایٹمی اسلامی ملک ئِ، آجوئی دے آ نن ہم عہدکینہ کہ وطن نا شونداری نا عمل ئِ برجاتخنہ، ملک آن دہشت گردی، لوڈشیڈنگ و جہالت ئِ چٹفنہ۔چناتا ملک اکن جوزہ غاتے سلام پیش کینہ، نن ہم ہندا جوزہ تون ملکی نظام ئِ سہی کننگ کن کاریم کینہ۔ پاکستان ئِ ایشیائی ٹائیگر و اسلام نا قلعہ اس جوڑ کینہ۔ داخیال آتا درشانی ئِ او دوشنبے نادے نیشنل انسٹیٹیوٹ آف اسپیشل ایجوکیشن اسلام آباد اٹی خصوصی چناتتون جشن آجوئی نا دود آن تران کرسا کرے۔ وزیر مملکت خصوصی چناتے تون اوار بیرک ئِ چست کرے و جشن آجوئی نا کیک ئِ کاٹ کرے۔ خصوصی چناک قومی ترانہ و ملی نغمہ غاتیا اشارہ نا زبان اٹی پرفارم کریر۔ دود اٹی کیڈ انا ایلو تعلیمی ادارہ غاتیان بروک آ طالب علم آک ہم پرفارم کریر۔ داوخت آ دودآن تران کرسا وزیر مملکت پارے کہ ملک انا 70 می آجوئی دے ئِ خصوصی چناتتون اڈتننگ نا فیصلہ کرے۔ بصارت آن محروم چناک ملی نغمہ ٹی دا عہد کننگ ئُ کہ وطن آن تہاری تے چٹفنہ۔ نن ہم بایدے ہنداوڑنا جوزہ تخن۔ ڈاکٹر طارق فضل پارے کہ 70 سال اٹی پاکستان اسلامی ملک آتیٹی نمان ئُ ہند اس دوئی کرے و پاکستان اسٹ انگا ایٹمی اسلامی ملک ئِ۔ وزیر مملکت پارے کہ آجوئی دے آ نن ہم داعہد کینہ کہ وطن نا شونداری نا عمل ئِ برجاتخنہ۔ و ملک آن دہشت گردی ، لوڈشیڈنگ و جہالت ئِ چٹفنہ۔ اوپارے کہ وزیراعظم تعلیمی ریفارمز پروگرام ترندی اٹ برجائِ و مسہ نیم کروڑ روپئی نا خڑچ آن خصوصی چناتے پنچ بس تننگانے، دہ کروڑ روپئی نا خڑچ آن خصوصی تعلیمی ادارہ غاتا اپ گریڈیشن نا بناءمسنے۔ وزیر مملکت پارے کہ اسلام آباد نا تعلیمی نظام ئِ غٹ ملک اکن ماڈل اس جوڑ کینہ۔ تعلیمی ادارہ غاتیٹی زیات آن زیات داخلہ غاتے المی جوڑ کینہ۔ اوپارے کہ چناتا ملک اکن جوزہ غاتے سلام پیش کینہ۔ نن ہم ہندا جوزہ تون ملکی نظام ئِ سہی کننگ کن کاریم کینہ و پاکستان ئِ ایشیائی ٹائیگر و اسلام نا قلعہ اس جوڑ کینہ۔
