بے وڑحالیت آتیان پد ہم پاکستان ہر پِڑ آتینا لائخی تے منفینے، 2025ءاسکان پاکستان ئِ دنیا نا ٹاپ 25 ملک آتا صف اٹی اوار کننگ نناہدف ئِ
اسلام آباد۔ 14 اگست (اے پی پی) وزیر داخلہ احسن اقبال ملک انا 70 می آجوئی دے انا وخت آ مچ آ قوم ئِ مبارکبادی تسنے۔ تینا کلہو اٹی وزیر داخلہ پارے کہ بے وڑحالیت آتیان پد ہم پاکستان ہرپِڑ آ تینا لائخی تے منفینے۔ وزیر داخلہ پارے کہ 2025ءاسکان پاکستان ئِ دنیا نا ٹاپ 25ملک آتا صف آتیٹی اوار کننگ ننا ہدف ئِ، ملکی شونداری و شونہالی کن اقتصادی و راجی شونداری نا پالیسی تے برجاءتخنگ المیئِ۔ اوپارے کہ آجوئی دے انا وخت آ ننے ہمو اصول و ضوابطہ غاتا پاسداری ئِ المی جوڑ کروئی مریک ہر اقائد اعظم محمد علی جناح پاکستان ئ، اسہ شون ہلوک شرحالی و حقی جمہوری ریاست اس جوڑ کننگ کن وضع کریسس۔ وزیر داخلہ پارے کہ آجوئی دے انا وخت آ ننے بطور قوم غٹ تہہ نا و پیشن نا خلیس آتون مون تننگ و اوفتے شکست تننگ نا عزم ئِ کروئی مریک، نن اسہ ایلو ٹی ایلمی و سیوت ئِ مون آ درسا دہشت گردی و انتہاءپسندی نا غٹ مظاہر آتے شکست تروئی مریک۔ وزیر داخلہ پارے کہ بطور قوم ننے سخت خواری، ایمانداری و عزم اتون اسہ شون ہلوک ئُ پاکستان اسے کن پالیسی وضع کروئی مریک۔
