علاقائی امن و سوگوی و شونداری کن پاکستان و چین نا نیام اٹ کمکاری برجاسلک
اسلام آباد۔ 14 اگست (اے پی پی) صدر مملکت ممنون حسین و چین نا نائب وزیراعظم وینگ یینگ پارینو کہ علاقائی و امن و سوگوی و شونداری کن پاکستان و چین نا نیام اٹ کمکاری برجاسلک و ہڑتوم آ ملک آک انسانیت نا شونداری و شونہالی کن اواری اٹ کاریم کرسا کیرہ، ہڑتوم آ سرکڑدہ غاک پاک چین اقتصادی راہداری ڈٹ انا زوت پوروی آ ہم زورشاغار۔ ہڑتوم آ راہشون تا نیام اٹ دا امنائی دوشنبے نادے داڑے ایوان صدر اٹی مروک آ اوڑدہی ٹی مون آ بس۔ اوڑدہی ٹی ہڑتوم آ ملک آتا ڈل آک ہم ساڑی ئسر۔صدر مملکت پاکستان نا آجوئی دے 70می سال دے نا دود آتیٹی بڑزکو انگا کہول آ چین نا شرکت آ شرفدار آ مہمان تا منت واری ئِ ہرفسا پارے کہ داڑآن ہڑتوم آ ملک آتا پرخلوص رشتہ نا اندازہ مریک۔ اوپارے کہ ہڑتوم آ ملک آک ڈکھ و سکھ انا ہر وخت آ اسہ ایلو نا کاریم بریرہ ہرا دنیا کن اسہ مثال اسے۔ صدر مملکت داوخت آ پارے کہ پاکستان غٹ اہم معاملہ غاتیٹی چین نا مخ تفی ئِ کیک۔ اوساڑی ہی ٹی چین گل زمین آ بھارتی نیام تمنگ آ گڑتی نا درشانی ئِ کرسا پارے کہ داوخت آ چین ہرا سگ انا درشانی ئِ کرینے، او ستاکڑزک۔ اوپارے کہ پاکستان، تائیوان، تبت ، سنکیانگ و ساﺅتھ چائنا سی تون اوار غٹ معاملہ غاتیٹی چین نا پورو مخ تفی ئِ کیک۔ صدر مملکت پارے کہ پاکستان چین نا کمک اٹ دہشت گردی نا چٹفنگ کن کاریم کرسا کیک۔ اوپارے کہ اوغانستان اٹی امن کن چین نا کڑد ستاءکڑزک و نن اومیت کینہ کہ داکوشست آتا مثبت نتیجہ اس دوبریک و دا ویل زوت ایسر مریک۔ اوپارے کہ پاکستان بھارت تون جموں و کشمیر تون اوار غٹ جھیڑہ ہی ویل آتے ہیت وگپ نا کمک اٹ ایسرکننگ خواہک۔ اوپارے کہ او چین نا وزیراعظم نا زوت دورہ پاکستان نا چاروک ئِ۔ چین نا نائب وزیراعظم وونگ یانگ داوخت آ پارے کہ پاک چین سنگتی مفادات و سیاسی مصلحت آتیان بڑزتر ئِ۔ اوپارے کہ دہشت گردی نا چٹفنگ کن پاکستان تینا حالیت آتا رداٹ گچین ئُ کاریم کرینے ہرانا سوب ڈیہہ نا غٹ ملک آتا مقابلہ ٹی پاکستان نا حالیت بھاز گچین ئِ۔ داچرجوئی ٹی پاکستان ئِ چین نا کمک ہمیشہ رسینگک۔ اوپارے کہ صدر مملکت آجوئی دے انا دود اٹی شاندار تقریر کرے ہراڑآن قومی سیوت ئِ مون آ دننگک و شونداری نا رفتار ترند مریک۔ شرفدار آ مہمان پارے کہ پاک چین اقتصادی کمکاری ٹی ودکی است بڈ ئِ۔ دانا رفتار و کچ اٹی پدریسہ ودکی مرسا کیک۔ اوپارے کہ چین اکن پاکستان نا برآمدآتیٹی ودکی کننگک ۔ اوچندی جہانی و علاقائی معاملہ غاتیٹی چین اتون پاکستان نا پبی کمکاری ئِ چین اکن اسہ قیمتی ئُ میرات اس گوندسا پارے کہ پاک چین سنگتی اقوام عالم کن اسہ مثال اسے۔
