اسلام آباد۔ 27 فروری (اے پی پی) وزیراعظم نا کوآرڈی نیٹر موسمیاتی بدلی و چاگڑدی رابطہ رومینہ خورشید عالم زالبول آتا موسمیاتی بدلی نا بابت شمولیتی پالیسی تا اہمیت آ زور شاغسا پارینے کہ چاگڑدی بدلی تا منفی اثرآتون جوان وڑاٹ مون تننگ کن زالبول آتے زرگزرانی وڑاٹ واکدار کروئی مریک۔ داخیال آتا درشانی ءِ او پنچ شنبے نادے آداڑے موسمیاتی بدلی آ زالبول آتے واکدار کننگ نا بابت سیمینار آن تران کرساکرے۔ اوپارے کہ پاکستان نا زالبول آک کشت وکشار تون اوار چندی شونداری بشخ آتیٹی کماشی ءِ کننگ ءُ، زالبول آتا کڑد موسمیاتی بدلی نا ایسری کن المی ءِ ۔ رومینہ خورشید عالم پارے کہ موسمیاتی بدلی نا ویل زالبول آتا مشکل آتے ودفنگ ءِ، اوداہیت آ زور شاغا کہ زالبول آتے گیشتر المی وسیلہ، فیصلہ سازی نا پلیٹ فارم و موافقت پذیر ٹیکنالوجی اسکان کم رسینگ دوئی مریک۔ اوپارے کہ موسمیاتی بدلی بیرہ اسہ چاگڑدی ویل اس اف بلکن دا اسہ راجی و اقتصادی چیلنج اسے ہرا خاص وڑاٹ نزور و پسماندہ کمیونٹی تیٹی غیرمتناسب وڑاٹ زالبول آتیا اثرانداز مریک۔ اوپارے کہ دا چیلنج آتون مون تننگ کن صنف آ تالان نقط نظر نا گرج ءِ ہرا داہیت ءِ پک کے کہ زالبول آک نئے بیرہ فائدہ ہرفر بلکن موسمیاتی ریزیلیئنس و پالیسی سازی ٹی شریک مریر۔ سیمینار نا مہمانداری سینٹر آف پاکستان اینڈ انٹرنیشنل ریلیشنز کرے۔ وزیراعظم نا کوآرڈی نیٹر موسمیاتی بدلی و چاگڑدی رابطہ موسمیاتی بدلی خاص وڑاٹ خلقی علاقہ غاتیتی رہینگوک آزالبول، ہرا موسمیاتی بدلی نا بھسکاری تا گواچی ءُ، آ اثرات نا خاکہ پیش کرے۔ بشخ ہلوک بشمول پالیسی ساز، موسمیاتی چاہندار، کارندہ، و طالب علم آک موسمیاتی زیزیلیئنس، موافقت و تخفیف نا کوشست آتیٹی زالبول آتا کڑد ءِ سوگو کننگ نا حکمت عملی آ گپ وتران کننگ کن دود اٹی بشخ ہلکر ہرانا مسخت غٹ اکن زیات جوان و پائیدار آخبت ءِ مون آدننگ ءِ۔
