اسلام آباد۔ 22 جنوری (اے پی پی) بنجائی وزیرحوالکاری، شینکاری، قومی میرات و دودوربیدہ عطاء اللہ تارڑ پارینے کہ 190 ملین پاؤنڈ میگا کرپشن کیس اٹی ناقابل تردید شاہدی ساڑی ءِ،این سی اے دا زر ءِ ضبط کرسا حکومت پاکستان نا حوالہ کرے، بندلفافہ ءِ کابینہ ٹی اتنگا، شہزاداکبر پیسہ غاتے آفیشل دستاویز آتیٹی شوکرفے، بانی چیئرمین پی ٹی آئی تینا کرپشن نا ورندی ءِ ایتس۔ چارشنبے نادے آ 190 ملین پاؤنڈ میگاکرپشن نا بابت خصوصی گپ وتران کرسا بنجائی وزیر حوالکاری پارے کہ 190 ملین پاؤنڈ نا فیصلہ ءِ جہانی میڈیا کرپشن نا ہیڈلائنز تس، داکیس انا پبی شاہدی ساڑی ءِ، نیشنل کرائم ایجنسی آن کرائم پروسیڈ نا کمک اتٹ پیسہ حکومت پاکستان ءِ بس، شہزاد اکبر ایسٹ ریکوری یونٹ اٹی 190ملین پاؤنڈ ءِ سرکاری دستاویز آتاتہہ ٹی ظاہرکرفےوکابینہ ءِ ہم ہندا پارے کہ داپیسہ غاتے ملک ریاض و اونا فیملی آن ضبط کرسا حکومت ءِ پاکستان ءِ تننگانے، ہراتم دا زر ءِ حکومت ءِ پاکستان ءِ تننگاو شہزاد اکبر ہم امنا کرے تو اوٹی ہچ ءُ ابہام اس سلپک۔ اوبندلفافہ ءِ کابینہ ٹی ایس و داپیسہ غاتے سپریم کورٹ نا اکاؤنٹ اٹی پین جرمانہ سے نا مد اٹی اداکرے۔ اوپارے کہ اَرے زائیفہ ٹرسٹ جوڑکریر، رشوت اٹی اِرا سد کنال ڈغار ہلکر، چلو خوائسر، داکان بھلا کرپشن نا درور ملیپک۔ عطاء اللہ تارڑ پارے کہ 190 ملین پاؤنڈ میگاکرپشن ناناقابل تردید شاہدی ساڑی ئس، داپاکستان نا تاریخ نا غٹ آن بھلا کرپشن و رشوت نا کیس ءِ، دا غٹ گڑاک دستاویز آتون پک مسنو۔ اوپارے کہ سپریم کورٹ ہم تینا آرڈر اٹی پارے کہ اسہ دُوآن پیسہ غاتے ہلسا ایلودُوٹی تننگا، داپیسہ غاک حکومت پاکستان و پاکستان نا الس نا ئسر، ہرافتے غلط کاریم اٹ اتنگا۔ وزیرحوالکاری پارے کہ ملک ریاض و اونا مار انا برخلاف وڈی خوری و ڈغارتیا کوزہ نا بھاز انگا کیس آک چلینگ انگ ءُ ہراٹی راولپنڈی نا علاقہ تخت پڑی ٹی ناروا کوزہ و غیرکانودی ہاؤسنگ سوسائٹی و الس آن ارب آ روپئی مچ کننگ نا کیس اوار ءِ۔ اوپارے کہ نیب انا کنڈآن پریس ریلیز جاری مننگ آن پد ہم دبئی ٹی پروجیکٹ لانچ کننگ انگ ءِ، نیب پیدوار کرینے کہ دبئی نا پروجیکٹ اٹی انت کہ پیسہ اس لگک او منی لانڈرنگ نا زمرہ ٹی بریرہ۔ اوپارے کہ متحدہ عرب امارات نا حکومت تون ہم دا باندات ءِ ہرفنگک کہ حکومت داڑآ ایکشن ہلے، نیب اودے مفرور ڈیکلیئر کرینے، اگہ دا تینا دفا ع ءِ کننگ کریکہ تو 190 ملین پاؤنڈ کرپشن کیس اٹی ہم عدالت نا مون آ سلیسکہ۔ اوپارے کہ اومہالو ہم عدالت آتیان نرنگ نا کسر ءِ اختیار کرے، عدالت آتا مون آ پیش متو، اوفتا جائیداد آک مہالوہم ضبط مسنو، نیب ایلو کیس آتا تہہ ٹی ہم جائیداد ضبط کننگ نابابت کارروائی کننگ ءِ۔ اوپارے کہ نیب الس ءِ معلومدار کرینے کہ دبئی پروجیکٹ اٹی زرکاری منی لانڈرنگ نا زمرہ ٹی بریک ہنداسوب آن داٹی زرکاری کننگپ۔ اوپارےکہ نیب اٹی چندی کیس آک ساڑی ءُ، دابابت عدالت نا مون آ ہچ وڑنا ڈیفنس اس پیش کپننگ انگ ءِ، 190 ملین پاؤنڈ کیس اٹی ہم دا مفرور مسنو تو مون آ ہم کانودی کارروائی بایدے پورو مرے۔ داہُننگپ کہ دیراس ہراپوزیشن آٹی ءِ یا کس اسے تون اخس پیسہ ارے۔ اوپارے کہ ملک ریاض و ایلو مخلوق نا برخلاف بھاز انگا شاہدی و کیس ساڑی ءِ ، اوفتے مرے کہ عدالت آتیٹی تینا کیس آتون مون ایتر ہراٹی او بے سہب مسنو۔ بنجائی وزیر پارے کہ نیب کانود نا رداٹ کاریم کننگ ءِ، داوڑاولیکو وار مسنے کہ بااثر مخلوق آ نیب غٹ کانودی لوازمات آتے پورو کرسا شاہدی تا بنداو آ دُوشاغانے۔ اوپارے کہ برطانیہ نا حکومت جرمانہ نا وڑاٹ ملک ریاض و علی ریاض ملک نا ویزہ منسوخ کرے ہراکریمنل پروسیڈ نگز آن بیدس ممکن الوکہ، اوبرطانیہ ٹی تینا ویزہ بحال کرفنگ کن کیس فائل کرے، برطانیہ نا حکومت ہراتم اسکان کس اسے نا برخلاف گڑاس پک مف ہمووخت اسکان کس اسے نا ویزہ ءِ منسوخ کپک، دانا مطلب ءِ کہ ہراپیسہ غاتے ضبط کننگاسس او حکومت پاکستان نا ملکیت ئسر و اوضبط کرسا حکومت پاکستانءِ تننگا۔ بنجائی وزیر پارے کہ پی ٹی آٹی والا سیاست ءِ مذہب آن پیشن تخر، بانی چیئرمین پی ٹی آئی تینا کرپشن و رشوت نا ورندی ءِ ایتے، مذہب نا پداٹ ڈکسا تینا گندہ انگا ڈوہ ءِ ڈکھنگ نا کوشست کپ۔
