واشنگٹن۔ 22 جنوری (اے پی پی) بنجائی وزیر داخلہ محسن نقوی واشنگٹن اٹی کانگریس مین تھامس رچرڈ سوازی و کانگریس مین جیک برگمین تون اوڑدہی کرے۔ کانگریس مین تھامس رچرڈ سوازی نا تعلق ڈیموکریٹک وخت اس کہ کانگریس مین جیک برگمین نا تعلق ری پبلکن پارٹی آن ءِ۔ پاکستانی کاکس نا باسک تھامس رچرڈ سوازی و کوچیئرجیک برگمین تون اوڑدہی ٹی تین پہ تینی است خواہی نا امور، پاک امریکہ تعلقداری تون اوار ایلواہم باندات آتیا گپ وتران کننگا۔ اوڑدہی ٹی اوغانستان نا حالیت آتیا ہم گپ وتران کننگا۔ اوڑدہی ٹی پاک امریکہ تعلقداری تے مون آ دننگ آامنا کننگا۔ وزیرداخلہ محسن نقوی کانگریس مین تھامس سوازی و کانگریس مین جیک برگمین ءِ پاکستان نا دورہ نا سلہ خلک۔ بنجائی وزیر داخلہ محسن نقوی پارے کہ امریکہ پاکستان نا بھاز اہم زرگزرانی و دفاعی شریدار ءِ، پاکستان نا راجی بشخ آتا گچینی کن امریکی کمکاری ءِ قدر انا نظرا ٹ ہرنہ۔ اوپارے کہ پاکستان امریکہ تون ہڑتوم آ کنڈآتا تعلقداری تے خاص اہمیت ایتک، امریکہ تون غٹ بشخ آتیٹی پین شریداری خوانہ۔ وزیر داخلہ محسن نقوی پارے کہ نا دورہ ءِ پاکستان آن تین پہ تینی تعلقداری تے پین سوگو کننگ اٹ کمک رسینگک۔ کانگریس مین تھامس سوازی پارے کہ پاکستان تون تعلقداری تے پین سوگو کننگ کن سنبرینگوک اُن، زوت پاکستان نا دورہ ءِ کیوہ۔ اوڑدہی ٹی 30 اپریل آ پاکستان کاکس کانفرنس واشنگٹن ڈی سی ٹی اڈترفنگ نا فیصلہ ءِ کننگا۔ امریکہ ٹی پاکستان نا سفیر رضوان سعید شیخ ہم داوخت آ ساڑی ئسک۔
