اسلام آباد۔22جنوری (اے پی پی): مزن وزیر محمد شہباز شریف ءَ چین ءَ کشتءُ کشاری پڑءِ تہا ھیل کاری کنگءِ ھاترءَ دیم دئیوکیں نودربرآنی گچین کنگءَ میرٹ ءَ راالم کنگءِ سرءَ پنتءُ شون کتگ ءُ گشتگ کہ پاکستانی نودربرآناں چین ءَ جدید کشتءُ کشاری ھیل کاری ءِ سرجمیں حرچءَ پاکستان ءِ حکومت چست کنت۔ چارشمبے ءِ روچءَ مزن وزیر گس ءِ میڈیا ونگ ءَچہ شنگ بوتگیں بیان ءِ ردءَ مزن وزیر محمد شہباز شریف ءِ سروکیءَ چین ءَ جدید کشتءُ کشاری ھیل کنگ زوروکیں پاکستانی نودبرآنی ہوالگ ءَ چارءُ تپاسی دیوان بوتگ۔دیوان ءَ بنجاہی وزیر احسن اقبال ، رانا تنویر حسین ، احد خان چیمہ، چیئرمین ہائر ایجوکیشن کمیشن ءُ ہمگرنچیں مزنیں حکام ہوار بوتگ اَنت۔ مزن وزیر ءَ پورٹل ءِ وسیلگ ءَ درخواست آنی چار ءُ تپاسی ءِ وھد ءَ گچین کاری ءِ رہبند آناں پیلو نہ بوتگیں نودربر آنی شکایت آنی گیواری ءِ واستہ یک کمیٹی ءِ جوڑ کنگ ءِ ہدایت کت ءُ گوشت کہ چین پاکستان ءِ یک دیریں دوست اِنت ایشی ءِ کشت ءُ کشاری پڑ ءَ دیمروئی بے درور اِنت . . چین ءِ تر ءُ تاب ءِ وھد ءَ آئی ءَ چین ءِ سروکی ءَ چہ لوٹ کتگ کہ پاکستانی نودربر آناں کشت ءُ کشاری شوبگ ءَ نوکیں تربیت پجارینگ بہ بیت۔ چہ خدا ءِ فضل ءُ کرم ءَ نودربرانی اولی ٹولی زوت چین ءَ زراعت ءِ پڑ ءَ دیمروئی تربیت ءِ ھاتر ءَ روت۔ مزن وزیر ءَ گوشت کہ بلوچستان ءِ نودربر آنی واستہ کشت ءُ کشاری پڑ ءَ ایڈوانس ٹریننگ ءِ واستہ چین ءَ رووکیں نودربر آنی تہ ءَ 10درسد ھاسیں کوٹہ ایر کنگ بوتگ۔ ما چینی سروکی ءُ چینی یونیورسٹی آنی منت وار ایں کہ آہاں پاکستانی نودربراں چین ءَ زرعی ءِ دیمروئی ءِ تربیت ءِ موہ داتگ۔مزن وزیر ءَ را گند ءُ نند ءَ گوشگ بوت کہ کشت ءُ کشاری پڑءَ گوں سیادی داروکیں نودربر آں پورٹل ءِ وسیلگ ءَ شفاف رنگ ءَ درخواست جم کتگ۔ 1287 درخواست ءِ تہ ءَ 711 نودربراں ٹھینگ بوتگیں تربیت ءِ رہبند سرجم کتگ اَنت۔ اے نودربرانی تہ ءَ بلوچستان ءُ گلگت بلتستان ءِ امیت وار ھم ھوار اَنت ۔ دیوان ءَ گیش گوشگ بوت کہ اے نودربر دو بھر ءَ چین ءَ دیم دیگ بنت۔ اولی بیچ ءِ تہ ءَ 300 مرد ءُ جنیں نودربر آبپاشی ءِ گہتری، مال ءِ نادراھی ءِ پٹ ءُ پول ءُ نگرانی، مال ءِ نسل کشی ءُ نوکیں جینیات، ءُ نوکیں بیج ءِ پیداوار ءُ پروسیسنگ ءِ پڑ ءَ تربیت ءِ واستہ روان دیگ بنت۔ اولی ٹولی ءِ نودربر مارچ 2025 ءَ چین ءَ روگ ءَ انت۔دیوان ءَ گیش سرپدی دیگ بوت کہ 400 نودربر آنی دومی ٹولی ءَ را اے سال ءِ میان ءَ چین ءَ روان دیگ بیت کہ ایشی ءِ تہ ءَ زراعت ءِ تہ ءَ نوکیں مشینری ءِ کارمرد کنگ ءِ سر ءَ دلگوشی دیگ بیت، تیزی ءَ گوں فصلانی دیمروئی، ءُ کشت ءُ کشاری ءِ دیمروئی ءِ ھاتر ءَ نوکیں ٹیکنالوجی ءِ پڑاں تربیت دیگ بیت، ایشی ءِ تہ ءَ مصنوعی ذہانت ءِ کارمرد کنگ، ءُ میوہ ءُ سبزی ءِ پروسیسنگ ھوار اِنت۔
