۔06جولائی (اے پی پی) وزیراعظم محمد نواز شریف پارینے کہ قوم اودے پنچ سال انا مد اکن مینڈیٹ تسنے ، قوم ئِ کنے آ بھروسہ ئِ و او فک اونا شونداری نا حامل پالیسی تیا پکا یخین تخرہ۔ اوداخیال آتا درشانی ئِ پنچ شنبے نا دے تاجکستان نا اِرادے ئی دورہ ٹی تین تون اوار صحافی تتون ہیت وگپ کرسا کرے۔ وزیراعظم پارے کہ الس 2018ءٹی اسہ وار ولدا اونا جماعت ئِ وونٹ ترسا اقتدار اٹی اتیک انتئے کہ اوفک اونا کارکڑد و اونا زند اٹی نمان بدلی اتنگ نا لائخی آن جوانی اٹ معلومدار ئُ ۔ جے آئی ٹی نا کنڈآن اونا خاہوت نا باسک آتیان جاری پوچھ گچھ انا بابت سوج انا ورندی ٹی وزیراعظم پارے کہ خلیس نا ہچ ئُ ہیت اس اف انتئے کہ ننا دوک صاف ئُ۔ وزیراعظم ہریفے کہ کنا برخلاف انت دوبہ غاک ئُ؟، انت مگے ای قومی خزانہ ئِ پلاٹ؟، انت مگے ای کرپشن اس کریٹ یا کک بیک اس دوئی کریٹ؟۔ نواز شریف پارے کہ ہموبندغ نا احتساب ئِ کننگ انگ ئِ ہرا دا ملک ئِ جوہری واک اس جوڑ کرے۔ اوداہیت آ است اسونی نا درشانی ئِ کرے کہ اونا خاہوت نا کاروباری معاملہ غاتے سیاسی مسخت آتے کن کاریم اٹ اتنگ انگ ئِ۔ وزیراعظم پارے کہ اونا حکومت نا برخلاف وار وار سازش کننگانے۔ اواومیت ظاہر کرے کہ داوار ہم اونا مخالف آک بھاز بے وڑ بے سہب مریرہ، ای وخت اس ہم شکست ئِ امنا کتہ نٹ، نن 2014ءٹی دھرنہ و ولدا 2016ءٹی اونا ایلو راﺅنڈ تون مون تسن و انشاءاللہ دا تنکی آن ہم سرسہب مرینہ۔ وزیراعظم پارے کہ اونا خاہوت ئِ صدر مشرف و بے نظیر بھٹو انتقام نا نشانہ جوڑ کریر وخت اس کہ 1972ءٹی اونا کارخانہ غاتے ہم قومیا کننگا و اسہ پیسہ اس ہم تننگ تو ولدا ہم ننا احتساب ئِ کننگ انگ ئِ۔ تاجکستان نا تینا دورہ نا بابت وزیراعظم پارے کہ اونیامی ایشیائی ریاست آتون کمکاری نا پوسکن ئُ کسراس ملانے و علاقائی رابطہ و اقتصادی ہم آہنگی نا اونا تغ بالآخر عملی دروشم اس اختیار کننگ ئِ۔ وزیراعظم پارے کہ تاجکستان ، اوغانستان و کرغزستان نا راہشون آتون اونا مفید اوڑدہی مس۔ تاجکستان اٹی پاکستانی زرکار آتے کن بھلو گمان اس ارے انتئے کہ ملک ئِ تینا معیشت نا سوگوی کن بنداوی ڈھانچہ و صنعتی یونٹ آتا گرج ئِ۔ اوپارے کہ پاکستان نیامی ایشیائی ریاست آتے سمندر و ایلو دنیا اسکان گونڈ انگا ممکنہ کسر اس فراوان کرے ولے اوپارے کہ ڈیہہ ٹی شونداری کن اوغانستان اٹی امن و سوگوی المی ئِ۔ اوپارے کہ پاکستان ہمیشہ تینا غٹ ہمسایہ غاتون تعلقداری تیٹی گچینی کن مخلصانہ کوشست کرینے و او بالخصوص اوغانستان تون گچین تعلقداری تا خواہندار ئِ انتئے کہ اونا اقتصادی شونہالی نا اسہ ایلو تون خڑکی تعلق ئِ۔ کشمیر نا بابت وزیراعظم پارے کہ تینا ہیت وگپ اٹی اومقبوضہ کشمیر اٹی انسانی حق انا سنگین خلاف ورزی تا بارواٹی ہم معلومدار کرے۔ اوکوزہ گر فوج انا کنڈآن ساڑی آ تُو تیٹی اسہ سد آن زیات بے گناہ بندغ آتا شہیدی و پیلٹ گن آتا نشانہ جوڑ مروک آ 200 آن زیات بندغ آتاہم ذکر ئِ کرے۔ وزیراعظم پارے کہ او بھارت تون دیرینہ کشمیر نا جھیڑہ نا ایسری ئِ پٹنگ اٹی ہمیشہ پیش پیش مسنے۔ وزیراعظم یات ترفے کہ 1999 ءٹی اوہمو وخت انا بھارتی وزیراعظم اٹل بہاری واجپائی تون ہیت وگپ نا بنائِ کرے و بھارت آ زورشاغا کہ او بے گناہ کشمیری تا برخلاف بیدادی نا چرجوئی ئِ بند کے۔
