اسلام آباد۔5مئی (اے پی پی): مزن وزیر محمد شہباز شریف ءَ پہلگام ءِ وئیل ءَ را پاکستان ءَ گوں بے ثبوت ءَ بندوک کنگ ءِ بھارتی کوشست آناں رد کنان ءَ اے وئیل ءِ سر ءَ مزنیں تک ءِ ، شفاف ءُ غیر جانبداریں میاں اوستمانی پٹ ءُ پول ءِ ھاترا وتی پیشکش ءِ پدا پدر کتگ ءُ برطانیہ ءَ را ھم ایشی ءِ تہ ءَ ھوار بوھگ ءِ دعوت داتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ مزن وزیر محمد شہباز شریف ءَ دو شمبے ءِ روچ ءَ پاکستان ءِ واستہ برطانیہ ءِ ہائی کمشنر جین میریٹ ءَ گوں مزن وزیر گس ءَ گند ءُ نند کتگ۔ گند ءُ نند ءَ مزن وزیر ءَ پہلگام ءِ وئیل ءَ پد جنوبی ایشیا ءِ استیں جاور ھال آنی بابت ءَ برطانوی ہائی کمشنر آف پاکستان ءَ را سرپد کت۔ مزن وزیر ءَ پاکستان ءَ را ھچ وڑیں ثبوت ءِ دیم ءَ آرگ ءَ ابید اے وئیل ءَ گوں ھمگرنچ کنگ ءِ کوشست آناں رد کنان ءَ اے وئیل ءِ سر ءَ مزنیں تک ءِ ، شفاف ءُ غیر جانبداریں میاں اوستمانی پٹ ءُ پول ءِ واستہ وتی پیشکش ءِ پدا زور دات ءُ برطانیہ ءَ را ایشی ءِ تہ ءَ ھوار بوھگ ءِ دعوت دات۔ مزن وزیر ءَ گوشت کہ حکومت ءِ اولی ترجی ملک ءِ اقتصادی دیمروئی انت ءُ پاکستان کدی ھم اے وڑیں گامگیج نہ چست کنت کہ ایشی ءَ چہ دمگی امن ءُ ایمنی ءَ را ھترہ بہ بیت۔ مزن وزیر ءَ گوشت کہ برطانیہ ءَ پاکستان ءُ بھارت ءِ گوما وتی دوستیں سفارتی سیادی آناں پڑ ءَ ناگیگیں امن ءِ جاور ھال آنی گہتر کنگ ءِ واستہ وتی کرد ءَ را پیلو کنگ لوٹ ایت۔ برطانیہ ءِ ہائی کمشنر ءَ پاکستان ءِ موقف ءِ سر کنگ ءِ سر ءَ مزن وزیر ءِ شگر ءُ منت گپت ءُ گوشت کہ برطانیہ دمگی امن ءُ ایمنی ءِ واستہ پاکستان ءُ بھارت ءِ گوما کار کنت۔
