اسلام آباد۔5مئی (اے پی پی): صدر آصف علی زرداری ءَ دمگ ءَ امن ءُ ایمنی ءِ دیمروئی ءِ واستہ یکجائی ءَ کار کنگ ءِ ارزشت ءِ سر ءَ زور پر دیان ءَ گوشت کہ بھارت ءِ زوراکیں کارروائی دمگی امن ءُ ایمنی ءِ واستہ ھترہ جوڑ بنت۔ ایوان ءِ صدر ءِ پریس ونگ ءِ رد ءَ صدر ءِ مملکت ءَ اے ھیالانی درشانی ایران ءِ دری کارانی وزیر سید عباس اراقچی ءَ گوں تران کنان ءَ کتگ اَنت آئی ءَ دوشمبے ءِ روچ ءَ ایوان ءِ صدر ءَ آئی ءَ گوں گند ءُ نند کتگ۔ صدر ءِ مملکت ءَ گوشت کہ پاکستان ءُ ایران ءِ ءِ گوں راجدپتری ءُ براتی سیادی است اَنت۔ گند ءُ نند ءَ وت مہ وتی ھب ءُ واھگ ءِ جیڈھ آنی سر ءَ ھیال ریچی کنگ بوت۔ گند ءُ نند ءَ دمگی ایمنی ءِ جاور ھاسیں رنگ ءَ پہلگام ءِ وئیل ءَ پد بھارت ءُ پاکستان ءِ نیام ءَ برجاہیں کش ءُ چیل ءِ سر ءَ گپ ءُ تران کنگ بوت۔ اے موہ ءِ سر ءَ ایران ءِ دری کارانی وزیر ءَ گوشت کہ پاکستان ءِ تر ءُ تاب مزن رہشون آیت اللہ سید علی خامنہ ای ءُ ایران ءِ صدر مسعود پشمرگا ءِ ہدایت ءِ رد ءَ کنگ بوتگ ءُ استیں جاور آنی بابت ءَ پاکستان ءِ لیکہ ءَ سرپد آں ۔ ایران ءِ دری کارانی وزیر ءَ فریق آنی سر ءَ زور پر دات کہ آ کش ءُ چیل آنی تہ ءَ کمی ءِ واستہ تحمل ءِ کار ءَ بہ کن اَنت ءُ گوشت کہ ایران پاکستان ءِ گوما وتی سیادی ءَ را ارزشت دنت۔ سید عباس اراقچی ءَ گوشت کہ ایران وت مہ وتی سیت ءِ واستہ پاکستان ءِ گوما دو نیمگی سیادی ءَ را گیش مھکم کنگ ءِ واھشت مند اِنت۔ ایران ءِ دری کارانی وزیر ءَ دو نیمگی تجارت ءَ را وتی سرجمیں توانائی ءَ را گیش کنگ ءِ ضلورت ءِ سر ءَ ھم زور پر دات۔ گند ءُ نند ءَ افغانستان ءِ جاورحالانی سرا ہم گپ ءُ تران بوتگ ۔ ایران ءِ دری کارانی وزیر ءَ دمگی جیڈھ آنی سر ءَ پاکستان ءِ گوما کار کنگ ءِ دل یکیمی دات ۔ صدر ءِ مملکت ءَ یک ھاسیں موہ ءِ سر ءَ پاکستان ءِ تر ءُ تاب ءِ سر ءَ ایران ءِ دری کارانی وزیر ءِ شگر ءُ منت گپت۔ صدر ءِ مملکت ءَ گپ ءُ تران ءُ سفارتکاری ءِ پاکستان ءِ عزم ءِ یک رندے پدا گوشت۔ صدر ءِ مملکت ءَ دوئیں ملک آنی وت مہ وتی نپ آنی تہ ءَ ایران ءِ گوما تجارت ءَ را دیمروئی دیگ ءِ ضلورت ءِ سر ءَ ھم زور پر دات۔ گند ءُ نند ءِ وہد ءَ دوئیں پریک ءَ غزہ ءِ جاورحالانی سرا ہم گپ ءُ تران بوتگ ۔ فریقین ءَ غزہ ءُ مغربی کنارہ ءَ اسرائیل ءِ فورسز ءِ نیمگ ءَ برجاھیں زلم ءُ زوراکی ءُ انسانی ھکانی لگتمالی ءِ مذمت کتگ۔ ایران ءِ وزیر ءِ درئی کار ءَ ایران ءِ صدر ءِ نیمگ ءَ صدر آصف علی زرداری ءِ گوما ھم نیکیں واھشت آنی درشانی کت۔
RTB/OAB, 10:11
