حکومت جہانی مالیاتی ادارہ غاتا پت ئِ دوئی کننگ ئِ ، پلاننگ کمیشن

مسلم لیگ (ن) نا حکومت اٹی گدرینگوک آ چارسال اٹی شونداری ڈٹ آتیٹی 550 ارب نا بچت کننگا، شونداری ڈٹ آتیا شفافیت ئِ المی جوڑ کننگا
اسلام آباد۔ 07 جولائی (اے پی پی) پاکستان مسلم لیگ (ن) نا حکومت گدرینگوک آ چارسال اٹی پبلک سیکٹر ڈویلپمنٹ پروگرام نا کمک اٹ بے مثال شونداری، معیار و بچت نا پالیسی آ عمل کننگ ئِ، شونداری ڈٹ آتیٹی 550 ارب نا بچت کننگانے و غٹ شونداری ڈٹ آتیا شفافیت ئِ المی جوڑ کننگا، ملک انا شونداری و معیشت نا سوگوی ئِ اولیت آتیٹی تخا، ساڑی حکومت اقتدار ئِ سنبھالنگ آن پد معیشت، ملک انا شونداری ئِ اولیت تس و اقتصادی ٹک آتے گچین جوڑ کرے۔ وزیراعظم محمد نواز شریف نا سروکی ٹی حکومت جہانی مالیاتی ادارہ غاتا پت ئِ دوئی کننگ ئِ و جہانی بینک، اے ڈی بی پی و آئی ڈی بی پی کون آ ادارہ غاک اقتصادی و راجی بشخ آتیٹی ساڑی حکومت تون پبی کمک کننگ ئِ۔ جمعہ نا دے پلاننگ کمیشن نا کمامدارآک ”اے پی پی“ ئِ پاریر کہ حکومت بچت و معیار نا پالیسی آ عمل کننگ ئِ، شونداری ڈٹ آتیٹی 550 ارب نا بچت کننگانے و غٹ شونداری ڈٹ آتیا شفافیت ئِ المی جوڑ کننگا، ڈٹ بندی نا قابل کارندہ و افسر آتا خواری نا سوب ہم دانا قابل مسن کہ قومی خزانہ نا 550 ارب روپئی ئِ بچفنگ کرین۔ کمامدارآتارداٹ بنجائی حکومت پلاننگ کمیشن ئِ دُوارہ وت واجہ حیثیت اس تس تانکہ کسبی مہارت تخوک بندغ آتا کمک اٹ ڈٹ بندی نا عمل ئِ گچین جوڑ کننگ مرے۔ اوپارے کہ لواری ٹنل، نیو اسلام آباد بالی پٹ، نیلم جہلم ہائیڈرو پاور پروجیکٹ داسال پورو مریرہ، وزارت ڈٹ بندی مستین نا برعکس چاہندار آتا صلابت آن قابل عمل ڈٹ آتا بنائِ کرے، بلوچستان نا کچی کینال کن فنڈ جاری کرے ہراڑآن مچ آ صوبہ ئِ دیر انا آسراتی دوبریک، اینو مستین نا دا غٹ قابل عمل ڈٹ آتیا کاریم برجائِ ہرافتے ڈٹ بندی نا کمتی نا سوب فنڈ انا کمتی نا بہانہ ئِ کرسا توریر۔ اوپاریر کہ مئی 2017ءآن مئی 2018 ءاسکان قومی گریڈ اٹی 10 ہزار میگاواٹ بجلی مرحلہ وار اوار کننگک۔ 2025ءاسکان پاکستان نا شمار دنیا نا 25بھلا معیشت آتیٹی مریک۔ ساڑی حکومت نا 4سال اٹی سرکاری بشخ انا شونداری ڈٹ آتا حساب وکتاب نا رداٹ زرکار دوستانہ پالیسی تا کمک اٹ ملک اٹی توانائی تنکی نا چٹفنگ کن جنگی بنداو تیا کاریم نا بنائِ کرینو۔ توانائی تنکی نا مون ئِ توننگ کن جامع حکومت عملی آ عمل کرسا چندی گونڈ ومریس وختی ڈٹ آتیا کاریم ئِ ترند کرینو، چین نا کمکاری آن بروک آ 8آن 10 سال اٹی 21 ہزار میگاواٹ بجلی ودی کننگک ہراڑآن نئے بیرہ لوڈشیڈنگ چٹک بلکن کشت وکشار و صنعتی بشخ ئِ ہم شون ملک۔ داسوڈیم ، دیامر بھاشاڈیم ، نیلم جہلم ہائیڈرو پاور پروجیکٹ ، تربیلا فور ودیکی ڈٹ، نندی پور پاور پروجیکٹ ، اوچII پاور پروجیکٹ ، گڈو پاور اسٹیشن و گڈانی پاور پروجیکٹ کون آ ڈٹ آتا پوروی آن ملک توانائی نا تنکی ہمیشہ ہمیشہ کن چٹک۔ اوپاریر کہ پاکستان مسلم لیگ (ن) نا حکومت نا جامع معاشی پالیسی و ڈھانچہ جاتی اصلاحات آتیٹی چارسال اٹی پاکستان نا اقتصادی ٹک آتیٹی گچین بننگ بناکرینے۔ حکومت معیشت ئِ پائیدار شونداری نا کسر آ روان کننگ کن 2013-16ءکن نیامی مدت نا بجٹ فریم ورک اس ہم تیار کرینے۔