اسلام آباد۔5مئی (اے پی پی): مزن وزیر محمد شہباز شریف ءَ گوشت کہ پاکستان ایران ءِ گوما وتی راجدپتری، گہتریں براتی سیادی ءَ را سک باز ارزشت دنت ءُ پہلگام ءِ وئیل ءَ پد بھارت ءِ اشتعال انگیزیں رویہ ءِ آسر ءَ جنوبی ایشیا ءَ استیں کش ءُ چیل ءِ سر ءَ پاکستان سک باز جیڑگ ءَ اِنت۔ دو شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں پریس ریلیز ءِ رد ءَ اسلامی جمہوریہ ایران ءِ درئی کارانی وزیر سید عباس اراقچی ءَ مزن وزیر محمد شہباز شریف ءَ گوں گند ءُ نند کتگ۔ مزن وزیر ءَ ایران ءِ شہر بندرعباس ءَ بوتگیں غمناکیں تراک ءَ گران بھائیں جانی بیرانی ءُ سداں مردم ٹپی بوھگ ءِ سر ءَ ایران ءِ درئی کارانی وزیر ءَ گوں دلپدردی ءِ درشانی کت۔ آئی ءَ ھما مردمانی واستہ دعا کتگ کہ آھاں وتی نزیکیں مردم گار کتگ انت ءُ ٹپیانی زوت جان سلامتی ءِ واستہ ھم دعا کتگ۔ مزن وزیر ءَ ایران ءِ سروک آیت اللہ علی خامنہ ای ءُ صدر مسعود پزیشکیان ءَ گوں نیکیں واھگ آنی درشان کت۔ آئی ءَ گوشت کہ پاکستان ایران ءِ گوما وتی راجدپتری، گہتریں براتی سیادی ءَ را سک باز ارزشت دنت ۔ مزن وزیر ءَ صدر پزیشکیان ءِ گوما وتی بازیں گند ءُ نند ءُ گوستگیں ٹیلی فون کال ءِ یات ءَ کنان ءَ پاکستان ءُ ایران ءِ دو نیمگی سیادی آنی تہ ءَ جوانیں دیمروئی آنی سر ءَ دل یکیمی ءِ درشان کت ءُ تجارت، توانائی، سیم سر بندی ءُ دمگی رابطہ کاری ءِ تہ ءَ کمک ءَ را گیش کنگ ءِ ضلورت ءِ سر ءَ زور پر دات۔ مزن وزیر ءَ پہلگام ءِ وئیل ءَ پد بھارت ءِ اشتعال انگیز رویہ ءِ آسر ءَ جنوبی ایشیا ءَ استیں کش ءُ چیل ءِ سر ءَ پاکستان ءِ سک باز جیڈھ ءِ درشان کت۔ آئی ءَ پاکستان ءَ را اے وئیل ءَ گوں ھمگرنچ کنگ ءِ ھرچ وڑیں کوشست ءَ را چہ ھچ وڑیں ثبوت ءَ ابید رد کتگ۔ آئی ءَ گوشت کہ پاکستان ءَ پہلگام ءِ واکیہ ءِ پُشت ءِ راستی آنی پجارینگ ءِ واستہ میاں اوستمانی، شفاف، غیر جانبدار ءُ معتبریں پٹ ءُ پول کنگ ءِ پیشکش کتگ۔ آئی ءَ گوشت کہ اے سرجمیں جاور ھال آنی تہ ءَ پاکستان ءَ سک باز ذمہ واری ءِ گوما کار کتگ وھدیکہ دومی نیمگ ءَ بھارت ءَ میڈیا ءِ وسیلگ ءَ پروپیگنڈا بندات کتگ تانکہ دگنیا ءِ دلگوشی جموں کشمیر جیڈھ ءَ چہ کشگ بہ بیت کہ اے جیڈھ جنوبی ایشیا ءَ بے رھبندی ءِ مستریں سوب اِنت۔ آئی ءَ اے گپ ءِ سر ءَ ھم زور پر دات کہ بھارت ءِ نیمگ ءَ سندھ آپانی معاہدہ ءِ مھتل کنگ ءُ ایشی ءَ را آپی زوراکی ءِ رنگ ءَ کارمرد کنگ نا منّگ بیت پرچا کہ آپ پاکستان ءِ اُلس ءِ واستہ لال لیکہ ءِ جوڑ کنت۔ مزن وزیر ءَ پاکستان ءِ پڑ ءَ امن، برجائی ءُ دیمروئی ءِ واستہ ایران ءِ گوما کار کنگ ءِ پاکستان ءِ جزم ءِ یک رندے پدا گوشت۔ درئی کارانی وزیر اراقچی ءَ ایران ءِ سروکی ءِ نیمگ ءَ مزن وزیر ءَ را مبارکی کلوہ دات ءُ پاکستان ءِ گوما وتی سیادی ءَ را گیش مھکم کنگ ءُ جنوبی ایشیا ءَ امن ءُ ایمنی ءِ واستہ وتی کرد ءَ پیلو کنگ ءِ واستہ ایران ءِ جزم ءِ پدا زور دات۔ آئی ءَ صدر پزیشکیان ءِ مزن وزیر ءَ را اے سال ءِ گڈ ءَ ایران ءِ سرکاری تر ءُ تاب ءِ دعوت ءِ ھم پدا زور دات۔
