کاسا 1000 پاور پروجیکٹ آن ڈیہہ ٹی واپار اٹی ودکی، راجی و اقتصادی شونداری، توانائی نا کاختی ئِ مر کننگ ، روزگار نا وارخواہی ودی کننگ و علاقائی ہم آہنگی نا مون آ دننگ اٹی کمک رسینگک
پوگس(تاجکستان)۔06جولائی(اے پی پی) وزیراعظم محمد نواز شریف کاسا 1000 پاور پروجیکٹ ئِ ڈیہہ کن اسہ اہم ئُ ڈٹ اس گوندسا داڑآ زوت عملدرآمد نا حکومتی عزم انا اعادہ ئِ کرسا پارینے کہ ڈٹ آن ڈیہہ ٹی واپار اٹی ودکی، راجی و اقتصادی شونداری، توانائی نا کاختی ئِ مر کننگ ، روزگارنا وارخواہی ودی کننگ و علاقائی ہم آہنگی نا مون آ دننگ اٹی کمک رسینگک۔ اوداہیت انا درشانی ئِ پنچ شنبے نا دے داڑے کاسا 1000 بجلی ڈٹ انا با بت چارملکی دیوان آن تران کرسا کرے ہراٹی تاجک صدر امام علی رحمانوف ، اوغان صدر اشرف غنی و کرغزستان نا وزیراعظم سوران بے جین بیکوف بشخ ہلکر۔ وزیراعظم کاسا 1000 دیوان نا میزبانی و شاندار مہمان نوازی آ تاجکستان نا صدر نا منت واری ئِ ادا کرسا پارے کہ دا ننا ڈیہہ ٹی اسہ فلیگ شپ ئُ ڈٹ اسے ہرا نیامی ایشیاءٹی تاجکستان، کرغزستان و سویلی ایشیاءٹی اوغانستان و پاکستان ئِ بجلی نا گریڈ نا کمک اٹ اسہ ایلو تون ملفک۔ دانا پوروی آن پاکستان و اوغانستان ئِ تاجکستان وکرغزستان آن تیرمہ ٹی بالترتیب اسہ ہزار میگاواٹ و 300 میگاواٹ بجلی دوئی مریک۔ اوپارے کہ داڈٹ باسک ملک آتے کن اقتصادی، راجی و ماحولیاتی فائدہ اتیک و توانائی نا کاختی ئِ مر کننگ تون اوار اوار روزگار نا وارخواہی ودی مریک۔ واپار اٹی گچینی بریک و صاف توانائی نا فراوانی آن کاربن ڈائی آکسائیڈ اخراج اٹی کمتی واقع مریک۔ داڑآن علاقائی ہم آہنگی ٹی ہم کمک رسینگک۔ ننے داہیت ئِ المی جوڑ کروئی مریک کہ داڈٹ بروخت پورو مرے۔ وزیراعظم پارے کہ داڈٹ سلاہ ئی سنٹرل ایشیاءساﺅتھ ایشیاءریجنل الیکٹریسٹی مارکیٹ ئِ عملی جامہ اس بیرفنگ نا بابت اسہ اہم ئُ گام اسے۔ داتوانائی نا کمتی نا گواچی سویلی ایشیاءو وافر توانائی نا حامل نیامی ایشیاءنا نیام اٹ کمکاری نا مو ن آ دننگ نا جوان ئُ مثال اس مریک۔ وزیراعظم نواز شریف پارے کہ کاسا 1000 ڈٹ آن نئے بیرہ کرغزستان و تاجکستان ئِ محصولات دوئی مریک بلکن پاکستان و اوغانستان اٹی بجلی نا کاختی ٹی ہم کمتی واقع مریک و شونداری نا گمان آتیٹی ودکی مریک۔ دازیات تر کاروباری و زرکاری وارخواہی ودی کرسا اوغانستان کن ہم ریونیو نا ذریعہ مریک۔ اوداہیت آ خوشی نا درشانی ئِ کرے کہ 16مارچ 2017ءآ دوشنبے ٹی پاک تاجک اسیجائی ورکنگ گروپ توانائی و بنداوی ڈھانچہ و ٹیکنیکل کمیٹی نا ارٹ میکو دیوان اڈ ہلک۔ داہیت ہم است بڈ ئِ کہ 11مئی 2017ءآ اے بی بی ، سیمنز ، ایلسٹونیٹ کون آ سرکڑدہ مینو فیکچر رز آتون اوار کنورٹرز اسٹیشن آتے کن 5کمپنی پیش کش تسنو۔ وزیراعظم پارے کہ کنے پاننگانے کہ کرغزستان آن تاجکستان و تاجکستان آن اوغانستان اسکان ٹرانسمیشن لین تے کن ٹینڈر پیش کننگانے ہرافتاجاچ ئِ ہلنگ انگ ئِ۔ کنے اومیت ئِ کہ ٹرانسمیشن لین تیا کاریم زوت بناءکیک۔ وزیراعظم پاکستان نا حکومت نا کنڈآن ڈٹ آ زوت عملدرآمد نا عزم انا اعادہ کرسا پارے کہ ننے پاکستان اٹی راجی و اقتصادی شونداری و تینا صنعتی بشخ ئِ پورو لائخی اٹ چلیفنگ کن توانائی درکار ئِ۔ داڑآن روزگارنا وارخواہی ودی کننگ و ملک انا الس نا زند انامعیار ئِ ہم بڑز کننگ اٹی کمک رسینگک۔ یات سلے کہ کاسا 1000 ڈٹ تاجکستان و کرغزستان آن پاکستان و اوغانستان ئِ بجلی نا ترسیل نا ڈٹ اسے۔ توانائی نا بشخ اٹی تینا وڑنا اسٹ انگا ڈٹ کاسا 1000 نا بناءگدرینگوک آ سال مسوسس۔ کاسا اسہ ہزار ڈٹ اِراہزار ہژدہ ٹی پورو مریک۔ ڈٹ پاکستان ئِ ہڑزان و چاگڑد دوست بجلی نا فراوانی نا سوب جوڑ مریک۔ کاسا 1000 آن توانائی نا کاختی نا مون ئِ توننگ اٹی کمک رسینگک۔ ڈٹ آن علاقائی رابطہ غاتا مون آ دننگ و واپاری سرجز آک ودرہ۔ ڈٹ آن روزگار نا وارخواہی ودی مریک و ڈیہہ ٹی شونہالی بریک۔ جہانی بینک مارچ 2014ءٹی ڈٹ اکن 52کروڑ 65لکھ ڈالر نا گرانٹ و کریڈٹ فنانسنگ نا منظوری ئِ تسوسس۔ ڈٹ توانائی و واپاری راہداری تیان علاقائی ملک آتیٹی کمکاری ئِ ودفنگ نا وزیراعظم نا وژن نا عکاس ئِ۔
