اسلام آباد۔ 16 اکتوبر (اے پی پی) پاکستان و روس اقوام متحدہ و شنگھائی کمکار تنظیم تون اوار کثیر الجہتی فورم تیا کمکاری و واپار، صنعت، توانائی ، علاقائی رابطہ، سائنس، ٹیکنالوجی و تعلیم نا بشخ آتیٹی سوگو گپ وتران و کمکاری ءِ مون آدننگ آامنا کرینو۔ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف تون شنگھائی کمکار تنظیم نا سروک حکومت نا 23 می دیوان نا وخت آ جمہوریہ روس نا وزیراعظم میخائل مشوستنگی چارشنبے نادے آوزیراعظم ہاؤس اٹی اوڑدہی مس۔ ہڑتوم آ وزیراعظم آک ہڑتوم آ کنڈآتا کمکاری نا غٹ بشخ آتیا گپ وتران کریر و تدوک آ اِرا دہائی تیٹی پاکستان و روس انا نیام اٹ تعلقداری نا مثبت سمت آ است جمی نا درشانی ءِ کریر۔ اوواپار، صنعت، توانائی، علاقائی رابطہ، سائنس، ٹیکنالوجی و تعلیم نا بشخ آتیٹی سوگو گپ وتران و کمکاری ءِ مون آ دننگ آ امنا کریر۔ وزیراعظم محمد شہباز شریف تینا اولیکو دورہ ءِ ماسکو نا ہم ذکر ءِ کرے ہراکہ اونا ملک اسے نا اولیکو دورہ ئس۔ وزیراعظم تینا دورہ نا یات آتے ہڑتوم آ ملک آتا نیام اٹ تعلقداری نا سوگوی ٹی بدل کننگ نا است خواہی نا درشانی ءِ کرے۔ وزیراعظم محمد شہباز شریف روس اتون ہڑتوم آ کنڈآتا سیاسی، اقتصادی و دفاعی مذاکرات ءِ ترند کننگ نا پاکستان نا است خواہی نا درشانی ءِ کرے۔ ہڑتوم آ راہشونک اقوام متحدہ و شنگھائی کمکار تنظیم تون اوار کثیر الجہتی فورم تیا کمکاری ءِ برجاتخنگ نا ہم امنا کریر۔ وزیراعظم محمد شہباز شریف برکس اٹی پاکستان کن کمکاری آ روسی وزیراعظم نا منت واری ءِ ہرفے۔ اوبرجاسال جولائی ٹی آستانہ ٹی صدر ولادیمیر پیوٹن تون تینا بھرمی اوڑدہی نا ذکر ءِ کرے ہراٹی او ہڑتوم آ ملک آتا نیام اٹ تعلقداری نا پین مون آ دننگ نا امنا کریسر۔ وزیراعظم پاکستان و روس انا نیام اٹ مواصلاتی رابطہ غاتا مون آ دننگ کن براہ راست جہاز آتا اہمیت آ زور شاغا۔ روسی وزیراعظم شنگھائی کمکار تنظیم نا 23 می سروک حکومت دیوان کن پاکستان نا کنڈآن کروک آشاندار بست وبند آتا ستاءِ کرے۔ اوپاکستان نا حکومت و پاکستانی الس نا کنڈآن روسی ڈل انا جم وجوش اٹ بخیر و شاندار مہمانداری آ منت واری ءِہرفے۔ اوڑدہی ٹی ہڑتوم آ وزیراعظم آک تین پہ تینی است خواہی نا غٹ بشخ آتیا کمکاری ءِ پین مون آ دننگ آ امنا کریر۔ ہڑتوم آراہشونک السی رابطہ غاتا مون آدننگ کن روسی واردوزبان نا تدریسی تبادلہ و زرکاری و واپار نا آسراتی کن بینکنگ بشخ اٹی کمکاری نا مون آ دننگ آہم امنا کریر۔
