قازقستان و بیلاروس نا وزیراعظم آک شنگھائی کمکار تنظیم نا دیوان آن پد وطن آ روانہ مسر

اسلام آباد۔ 16 اکتوبر (اے پی پی) قازقستان نا وزیراعظم اولز ہاس بیکو تینوو و بیلاروس نا وزیراعظم رومن گولوچینکو شنگھائی کمکار تنظیم نا 23 می دیوان اٹی بشخ ہلنگ آن پد وطن آ پدی روانہ مسر، بنجائی وزیر زرکاری بورڈ، نجکاری و مواصلات عبدالعلیم خان ہڑتوم آ وزیراعظم آتے اسلام آباد بالی پٹ آ رخصت کرے و اوفتے الوداع پارے۔ بنجائی وزیر عبدالعلیم خان پارے کہ آخبت اٹ ہم ہنداوڑ رابطہ و دورہ غاتا خواہندار اُن ہرا ڈیہہ اکن بھاز فائدہ ئی پک مریرہ۔ قازقستان نا وزیراعظم و بیلاروس نا وزیراعظم بنجائی وزیرعبدالعلیم خان نا منت واری ءِ ہر فسا پاریر کہ شنگھائی کمکار تنظیم نا دیوان شاندار و بھاز جوان وڑاٹ مسنے و اوفتا پاکستان اٹ اڈکننگ بھاز خوشگوار ئس وخت اس کہ او بھاز انگا مثبت اومیت و خوشگوار یات آتون ہِننگ ءُ۔ شنگھائی کمکار تنظیم نا دیوان نا وخت آ بنجائی وزیر مواصلات، نجکاری وزرکاری بورڈ عبدالعلیم خان و روس انا ڈپٹی وزیر ٹرانسپورٹ دمتری ژراؤف نا نیام اٹ اہم اوڑدہی مس و دادیوان اٹی روس و پاکستان نا نیام اٹ مواصلات نا بشخ اٹی تین پہ تینی کمکاری آ گپ وتران و پوسکن آ ڈٹ آتیا سجفنگا۔ دیوان اٹی گپ وتران کرسا بنجائی وزیرعبدالعلیم خان پارے کہ پاکستان کن چین، اوغانستان نا کمک اٹ نیامی ایشیائی ملک آتسکان روڈ نیٹ ورک اہمیت نا حامل مریک وخت اس کہ روسی ڈپٹی ٹرانسپورٹ منسٹر دمتری ژراؤف پاکستان نا کمیونیکیشن سیکٹر اٹی زرکاری ٹی بھاز است خواہی نا درشانی ءِ کرے۔ دیوان اٹی ہڑتوم آ ملک آتا وزیر آک تینا گپ وتران اٹی پاریر کہ شنگھائی کمکار تنظیم نا دیوان بھاز مثبت مس و دا گام ڈیہہ انا شونداری ٹی اہم کڑد ادا کیک۔ دیوان اٹی بنجائی سیکرٹری ریلوائی نا بشخ ہلنگ و مواصلات نا بشخ اٹی اہم امور آ حوال تس۔