اسلام آباد۔ 15 اکتوبر (اے پی پی) وزیراعظم محمد شہباز شریف تون بیلاروس نا وزیراعظم رومان گولوف چینکو سے شنبے نادے آ اسلام آباد اٹی شنگھائی کمکار تنظیم نا کونسل آف ہیڈز آف گورنمنٹ (سی ایچ جی ) دیوان نا وخت آ ہڑتوم آ کنڈآتا اوڑدہی کرے ہراٹی وزیراعظم شہباز شریف ہڑتوم آکنڈآتا تعلقداری خاص وڑاٹ واپار، زرکاری، کشاری مشینری، اسیجائی وڑاٹ ٹیکٹر آتا تیاری و مواصلات نا بشخ آتیٹی کمکاری ءِ مون آ دننگ نا گرج آ زورشاغا۔ وزیراعظم آفس نا میڈیا ونگ آن جاری پریس ریلیز نا رداٹ شنگھائی کمکار تنظیم نا دیوان اٹی بیلاروس نا بشخ ہلنگ نا ستاءِ کرسا وزیراعظم شہباز شریف بیلاروس ءِ ایس سی او نا پورو باسک مننگ آ مبارکبادی پیش کرے و‘‘شنگھائی اسپرٹ’’ ءِ مون آ دننگ اٹ بیلاروس تون اواری اٹ کاریم کننگ نا پاکستان نا عزم انا درشانی ءِ کرے۔ داسال جولائی نا اول اٹی آستانہ ٹی صدر الیگزینڈر لوکاشینکو تون تینا بھرمی اوڑدہی نا ذکر ءِ کرسا وزیراعظم پارے کہ بڑزکو کہول انا باقاعدہ اوڑدہی ہڑتوم آ ملک آتا نیام اٹ خوشگوار تعلقداری ءِ اسہ مثبت رفتار اس فراوان کرینے ہرادے برقرارتخنگ نا گرج ءِ۔ اوہڑتوم آ کنڈآتا تعلقداری خاص کر واپار، زرکاری، کشاری مشینری، اسیجائی وڑاٹ ٹیکٹر آتا تیاری و مواصلات نا بشخ آتیٹی کمکاری ءِ مون آ دننگ نا گرج آ زورشاغا۔ گولوف چینکو ایس سی او سروک دیوان نا سرسہب اڈتننگ و اونا مثبت نتیجہ غاتیا پاکستان ءِ است انا حب اٹ مبارکبادی تس۔ اوپاکستان اٹ شاندار مہمانداری آ وزیراعظم محمد شہباز شریف نا منت واری ءِ ہرفے۔ اوباوری کرفے کہ بیلاروس شنگھائی کمکار تنظیم نا مسخت، اصول و اولیت آتے مون آدننگ کن وپاکستان نا شنگھائی کمکار تنظیم نا کونسل آف ہیڈز آف گورنمنٹ نا چیئرنا حیثیت اٹ پاکستان تون پبی کمک کیک۔ گولوف چینکو ہڑتوم آملک آتا نیام اٹ ہڑتوم آ کنڈآتا تعلقداری نا مثبت سمت آ است جمی نا درشانی ءِ کرے و اسیجائی کوشست آتا کمک اٹ فائدہ نا غٹ بشخ آتیٹی تین پہ تینی فائدہ مند کمکاری ءِ پین سوگو کننگ نا است خواہی نا درشانی ءِ کرے۔
