اسلام آباد۔ 15 اکتوبر (اے پی پی) وزیراعظم محمد شہباز شریف تون تاجکستان نا وزیراعظم کوہر رسول زادہ ہڑتوم آ کنڈآتا اوڑدہی کرے۔ سے شنبےنادے آ وزیراعظم آفس نا میڈیا ونگ آن جاری پریس ریلیز نا رداٹ داڑے شنگھائی کمکار تنظیم نا سروک حکومت نا دیوان نا وخت آ مروک آ دا اوڑدہی ٹی وزیراعظم محمد شہباز شریف ایس سی او، سی ایچ جی نا سالانہ دیوان اٹی تاجکستان نا فعال و تعمیری بشخ ہلنگ نا ستاءِ کرسا پار ے کہ بطور برادر ملک و علاقائی شریدار، پاکستان و تاجکستان نا نیام اٹ سنگتی و کمکاری نا پائیدار رشتہ ءِ۔ وزیراعظم برجاسال جولائی ٹی دوشنبہ نا تینا بھرمی دورہ نا ہم ذکر ءِ کرے و ہڑتوم آ کنڈآتا تین پہ تینی تعلقداری نا مثبت سمت انا کنڈآ پیش رفت آ است جمی نا درشانی ءِ کرے۔ اوداہیت آ زورشاغا کہ ہڑتوم آ ملک آتے اسیجائی فائدہ نا غٹ بشخ خاص کر واپار، زرکاری، توانائی و علاقائی رابطہ غاتا بشخ آتیٹی خڑکی و تین پہ تینی فائدہ مند کمکاری ءِ سوگو کننگ نا گرج ءِ۔ تاجک وزیراعظم کوہررسول زادہ شنگھائی کمکار تنظیم نا چیئرنا حیثیت اٹ پاکستان نا کنڈآن دیوان نا سرسہب اڈتننگ آ اودے مبارکبادی پیش کرے۔ اوتاجک ڈل و ایلو شریک ڈل آتا جم و جوش اٹ بخیر و شاندار مہمانداری آ پاکستان نا منت واری ءِ ہرفے۔ وزیراعظم شہباز شریف ءِ تاجکستان نا صدر امام علی رحمان نا کنڈآن نیک است خواہی نا کلہو ءِ سرکرسا کوہررسول زادہ پارے کہ تاجکستان و پاکستان نا نیام اٹ گیشتر کچ ساڑی ءِ ہراڑآن فائدہ ہرفنگ کن تاجکستان، پاکستان تون اواری اٹ کاریم کننگ کن پورو وڑاٹ سنبرینگوک ءِ۔ تاجک وزیراعظم وزیراعظم محمد شہباز شریف و حکومت پاکستان نا تاجکستان ءِ پاکستان آن بورہ برآمد کننگ نا موکل آ منت واری ءِ ہرفے و پارے کہ دا ہڑتوم آملک آتا نیام اٹ واپار ءِ مون آ دیک۔
