اسلام آباد۔ 15 اکتوبر (اے پی پی) صدر مملکت آصف علی زرداری پاکستان وکرغزستان نا نیام اٹ ہڑتوم آ کنڈآتا واپاری کچ اٹی ودکی نا گرج آ زور شاغسا پارینے کہ ہڑتوم آکنڈآتا واپار اٹ قابل قدر مصنوعات و تنوع اٹ ودکی کننگ مریک، کرغزستان تون غٹ تین پہ تینی است خواہی نا بشخ آتیٹی کمکاری ءِ ودفنگ نا خواہندار اُن۔ ایوان صدر پریس ونگ آن جاری بیان نا رداٹ داہیت ءِ صدر مملکت آصف علی زرداری کرغزستان نا وزراء نا کابینہ نا چیئرمین ژاپاروف اکیل بیک اوڑدہی ٹی کرے ہراصدر مملکت تون سے شنبے نادے آ اوڑدہی کرے۔ صدر مملکت پارے کہ ہڑتوم آملک آتا نیام اٹ ہڑتوم آ کنڈآتا واپاری کچ اٹی ودکی نا گرج ءِ، ہڑتوم آ کنڈآتا واپار اٹی قابل قدر مصنوعات و تنوع آن ودکی کننگ مریک۔ صدر مملکت پارے کہ کرغزستان کراچی و گوادر بندر گاہ تیان فائدہ ہرفنگ کیک۔ اوپارے کہ کرغزستان تون غٹ تین پہ تینی است خواہی نا بشخ آتیٹی کمکاری ءِ ودفنگ نا خواہندار اُن۔ صدر مملکت آصف علی زرداری پارے کہ سلامتی کونسل نا بے آخبتی سیٹ آ پاکستان نا سرسہب گچین کاری ٹی کرغزستان نا مخ تفی آ منت وار اُن۔ اوڑدہی ٹی کرغزستان نا وزراء کابینہ نا چیئرمین ژاپاروف اکیل بیک ہم گپ وتران کرسا پارے کہ سنگت ملک آتون واپار ءِ مون آدننگ کرغزستان نا اولیت ءِ، کرغزستان زرگزران، کاروبار و ٹیکنالوجی نا بشخ آتیٹی ہڑتوم آ کنڈآتا کمکاری ءِ ودفنگ نا خواہندار ءِ۔ ژاپاروف اکیل بیک پارے کہ کرغزستان نا زرگزرانی شونداری نا سوب تعمیراتی و ٹیکسٹائل بشخ اٹی افرادی قوت کن بھلو وارخواہی ءُ۔ اوپارے کہ کرغز شاری تیکن پاکستانی ویزہ نا جاری کننگ نا عمل ءِ آسان کننگ آ منت واری ءِ ہرفنہ۔
