اسلام آباد۔ 15 اکتوبر (اے پی پی) وزیراعظم محمد شہباز شریف جمہوریہ کرغزستان تون کمکاری ءِ پین سوگو کننگ نا است خواہی نا درشانی ءِ کرسا واپار، زرکاری، السی و علاقائی رابطہ غاتا بشخ آتیٹی کمکاری ءِ ودفنگ نا گرج آ زور شاغانے۔ وزیراعظم آفس نا میڈیا ونگ آن جاری بیان نا رداٹ اسلام آباد اٹی اڈ ہلوک شنگھائی کمکار تنظیم نا کونسل آف ہیڈز آف گورنمنٹ (سی ایچ جی) دیوان نا وخت آ جمہوریہ کرغزستان نا وزراء کابینہ نا چیئرمین ژاپاروف اکیل بیک تون اوڑدہی کرے۔ وزیراعظم شنگھائی کمکار تنظیم نا دیوان اٹی جمہوریہ کرغزستان نا بشخ ہلنگ نا منت واری ءِ ہرفے و ایس سی او نا ساڑی آ سروک نا حیثیت اٹ کرغزستان نا کنڈآن پاکستان نا مخ تفی نا ستاءِ کرے۔ وزیراعظم ہڑتوم آملک آتا نیام اٹ متکن برادرانہ تعلقداری نا ذکر ءِ کرسا پاکستان وکرغزستان نا نیام اٹ ہڑتوم آ کنڈآتا تعلقداری نا مون آدننگ آ است جمی نا درشانی ءِ کرے۔ وزیراعظم جمہوریہ کرغزستان تون کمکاری ءِ پین سوگو کننگ نا است خواہی نا درشانی ءِ کرے و دا چرجوئی ٹی واپار، زرکاری، السی و علاقائی رابطہ غاتا بشخ آتیٹی کمکاری ءِ ودفنگ نا گرج آ زور شاغا۔ ژاپاروف اکیل بیک پاکستان نا کنڈآن شنگھائی کمکار تنظیم نا سروک حکومت نا دیوان نا سرسہب اڈتننگ آ وزیراعظم شہباز شریف ءِ مبارکبادی تس و اوڑتون اوار ہی دورہ غا بروک ڈل آتا جم و جوش اٹ بخیر، گچین بست و بند و شاندار مہمانداری آ منت واری ءِ ہرفے۔ اوکرغزستان نا پاکستان تون کمکاری ءِ برجاتخنگ نا است خواہی نا درشانی ءِ کرے ہراڑآن ہڑتوم آملک آتا الس نا تین پہ تینی مفاد نا غٹ بشخ آتیٹی ہڑتوم آ کنڈآتا کمکاری ءِ پین مون آ دننگ مریک۔
