اسلام آباد۔ 15 اکتوبر (اے پی پی) صدر مملکت آصف علی زرداری تون چین نا وزیراعظم لی چیانگ اوڑدہی کرینے۔ سے شنبے نادے آ داڑے ایوان صدر اٹی مروک آ اوڑدہی ٹی زرگزران، زرکاری و علاقائی رابطہ غاتون اوار اہم بشخ آتیٹی ہڑتوم آکنڈآتا سٹریٹجک کمکاری ءِپین گہراکننگ نا عزم انا درشانی ءِ کرسا پاننگاکہ ہڑتوم آملک آک پاک۔ چین اقتصادی راہداری ڈٹ آتیا عملدرآمد ءِ ترند کیرہ۔ ایوان صدر نا پریس ونگ آن جاری بیان نا رداٹ داوخت آ صدر مملکت پارے کہ چین اتون سنگتی پاکستان نا خارجہ پالیسی نا اہم جزو ءِ، اوہڑتوم آملک آتا نیام اٹ کمکاری نا پوسکن ءُ کسرپٹنگ نا اہمیت آ زور شاغا و پارے کہ پاک۔چین تعلقداری ءِ ودفنگ نا پین گنجائشت ساڑی ءِ۔ صدر مملکت واپاری و السی رابطہ غاتے سوگو کننگ کن ہرموسمی سڑک آتا کمک اٹ رابطہ غاتے ودفنگ نا گرج آ زور شاغسا پارے کہ چینی کمپنیک پاکستان اسٹاک ایکسچینج اٹی زرکاری آن پاکستان اٹی ساڑی وارخواہی تیان فائدہ ہرفر۔ اوپارےکہ سی پیک و گوادر پورٹ نا کمک اٹ چین نا اقتصادی شونداری آن پبی فائدہ ہرفنگ نا وخت بسنے۔ صدر مملکت اودے پارے کہ او برجاسال نومبر اٹی چین نا دورہ ءِ کننگ نا ارادہ تخک، ہمو متکن آ سنگت آتون رابطہ قائم کننگ وتعلقداری تے پین سوگو کننگ کن گپ وتران نا چاری اُن۔ صدر مملکت اوڑدہی ٹی تینا مسکوہی دور ءِ حکومت اٹی چین انا کروک آ تدوک آ دورہ غاتے مو ن آتخاوپارے کہ پاکستان ءِ تین پہ تینی اہمیت نا اہم ویل آتیا چین نا مدام بدل مفروک مخ تفی دوئی مسنے۔ اودہشت گردانہ جلہو اٹی اِرا چینی شاری تا زوال کننگ آ ہڑزخواہی نا درشانی ءِ کرے و پارےکہ دا است ہسون واقعہ مچ آ قوم اکن تکلیف نا سوب جوڑ مس۔ صدر مملکت پارے کہ پاک چین سنگتی نا دشمن چینی شاری تے شست کرسا ہڑتوم آکنڈآتا تعلقداری تے خراب کننگ و سی پیک ڈٹ آتے زہمی کننگ نا کوشست کننگ ءِ۔صدر پارےکہ دشمن تینا ناپاک کوشست آتے اٹ سرسہب مفک۔ اوڈوہدار تے مثالی سزا تننگ نا پاکستان نا عزم انا درشانی ءِ کرے۔
