اسلام آباد۔ 15 اکتوبر (اے پی پی) شنگھائی کمکار تنظیم نا سروک حکومت نا دیوان اٹی بشخ ہلنگ کن بیلاروس نا وزیراعظم رومان گولوف چینکو سے شنبے نادے آ اسلام آباد آ سرمس۔ نورخان ایئربیس آ بنجائی وزیر کانود و انصاف سینیٹر اعظم نذیر تارڑ و ایلو بڑزکو سول و فوجی کمامدارآک اودے ریڈ کارپٹ بخیرکریر۔ داوخت آ روایتی لویس اٹ ملبوس چناک شرفمند آ مہمان ءِ گلدستہ اس پیش کریر۔ ہڑتوم آ راہشون تا نیام اٹ خیرخواہی نا ہیت آتا درشانی ءِ ہم کننگا۔ بیلاروس نا وزیراعظم تون اوار بڑزکو کہول انا ڈل ہم ارے۔ یات سلے کہ شریک ملک آتا مندوبین آتیٹی مہالوآن شنگھائی کمکار تنظیم (ایس سی او) نا سروک دیوان اٹی بشخ ہلنگ کن سرمننگ بناکرینے۔ کانفرنس اٹی بشخ ہلنگ کن بروک آ شرفمند آتا بیابخیری کن مچ آ شار انا رنگ برنگی روشنائی و پھل آتا سجاوٹ و ایس سی او نا باسک ملک آتا بیرک آتے اٹ بیرفنگانے۔ وزیراعظم محمد شہبا زشریف ایس سی او سروک دیوان نا کماشی ءِ کیک۔
