اسلام آباد۔ 15اکتوبر (اے پی پی) چین نا وزیراعظم لی چیانگ و اسپیکر قومی اسمبلی ایاز صادق نا نیام اٹ سے شنبے نادے آ داڑے اوڑدہی مس۔ قومی اسمبلی سیکرٹریٹ آن جاری بیا ن نا رداٹ اوڑدہی ٹی ہڑتوم آ ملک آتا واپاری تعلقداری تے پین ودفنگ آ امنا کننگا۔ اسپیکر قومی اسمبلی داوخت آپارے کہ شنگھائی کمکار تنظیم نا دیوان نا مہمانداری پاکستان نا اعزازاسے۔ ایاز صادق پارے کہ چین پاکستان نا باپت و مخلص سنگت ءِ و پاکستان چین تون سنگتی آ گمرکیک۔ اسپیکر قومی اسمبلی پارے کہ شنگھائی کمکار تنظیم نا فورم آن علاقائی کمکاری ءِ مون آ دننگک و تنظیم نا دیوان آن علاقائی سوگوی ءِ سوگوی ملک۔ اسپیکر قومی اسمبلی پارے کہ پاکستان شنگھائی کمکار تنظیم نا پلیٹ فارم ءِ بھاز اہمیت ایتک، شنگھائی کمکار تنظیم نا دیوان آن جہانی کہول آ پاکستان نا مثبت تاثرتالان مریک۔ ایاز صادق پارےکہ شنگھائی کمکار تنظیم نا پلیٹ فارم آن علاقائی شونداری کن کاریم کینہ ۔ پاک چین اقتصادی راہداری نا ذکر ءِ کرسا اسپیکر قومی اسمبلی پارے کہ سی پیک ناڈٹ ہڑتوم آملک آتیکن خاص اہمیت تخک۔ اوڑدہی ٹی علاقائی امن و سوگوی کن اسیجائی کوشست آتیا ہم امنا کننگا۔ اسپیکرپارے کہ پاکستان اٹی چندی بشخ آتیٹی زرکاری نا گیشتر وارخواہی ساڑی ءِ۔ اوپارے کہ ہڑتوم آملک آتا نیام اٹ تعلیمی و سائنسی کمکاری ءِ ودفنگ نا ہم گرج ءِ۔ اوڑدہی ٹی توانائی نا بشخ اٹی اسیجائی ڈٹ آتا اہمیت آ گپ وتران کننگا۔ اسپیکر پارےکہ ٹیکنالوجی و ڈیجیٹل زرگزران اٹی کمکاری آن پاکستانی الس ءِ بھاز فائدہ مریک۔ اوپارے کہ چین پاکستان نا اقتصادی شریدار ءِ و آخبت اٹ تین پہ تینی کمکاری ءِ پین مون آدننگک۔ اسپیکر قومی اسمبلی پارے کہ پاکستان و چین نا نیام اٹ پارلیمان نا کہول آکمکاری و آخبت اٹ پارلیمانی ڈل آتا ہن و بر ءِ مون آدننگک۔ اوڑدہی ٹی قومی اسمبلی و چینی پارلیمان نا نیام اٹ رابطہ غاتے ودفنگ آامنا کننگا۔ اوپارے کہ چین نا وزیراعظم نا ساڑی آ دورہ ءِ پاکستان ہڑتوم آکنڈآتا تعلقداری تے پین سوگو کننگ اٹ اہم پیش رفت ثابت مریک۔
