اسلام آباد۔ 15 اکتوبر (اے پی پی) شنگھائی کمکار تنظیم نا سروک آتا دیوان اٹی بشخ ہلوک آ ملک آتا مندوبین آتا بنجائی دارالحکومت آ سرمننگ بناکرینے۔ درملکی مہمان تے بخیرکننگ کن رنگ برنگی روشنائی، پھل آتا سجاوٹ و ایس سی او ملک آتا بیرک و بینرآک شار انا رونق ءِ ودفینو، ایل ای ڈی ڈسپلے سکرین تے اسلام آباد نا مرکزی چورنگی تیا خلنگانے۔ مچ آ شار انا اہم ہند آتے رنگ برنگی روشنائی و پاکستانی بیرک آتے اٹ بیرفنگانے۔ چین نا اسٹیٹ کونسل نا وزیراعظم لی کیانگ اسہ بڑزکو کہولی ڈل اسے تون اوار تدوک آ دے بنجائی دارالحکومت آ سرمسوسس۔ شنگھائی کمکار تنظیم نا ارٹ میکو بڑزکو انگا فورم ایس سی او سی ایچ جی نا اِرادے ئی دیوان نا کماشی ءِ وزیراعظم محمد شہباز شریف کونسل نا ساڑی آ چیئرمین نا وڑاٹ کیک۔ سروکی دیوان اٹی بشخ ہلوک آ شنگھائی کمکار تنظیم نا باسک ملک آتا سروک آتیٹی چین نا وزیراعظم سٹیٹ کونسل لی چیانگ، بیلاروس ناوزیر اعظم رومان گولوف چینکو، قازقستان ناوزیر اعظم اولڑاس بیک تینوف، روس انا وزیر اعظم میخائل مشوستن، تاجکستان نا وزیر اعظم کوہر رسول زادہ، ازبک وزیر اعظم عبداللہ اریپوف، کرغزستان نا وزیر آتا کابینہ ناچیئرمین ڑاپاروف اکیل بیک، ایران نااول نائب صدر محمد رضا عارف وبھارتی وزیر خارجہ سبرامنیم جے شنکر ئسک اوار ءُ۔داکان بیدس منگولیا مبصر نا وڑاٹ سروکی دیوان اٹی بشخ ہلنگ ءِ ہرانانمائندگی ءِ منگولیا نا وزیراعظم کننگ اٹی ءِ، ترکمانستان نا بطور مہمان خاص نمائندگی وزیر آتا کابینہ نا نائب چیئرمین راشد مریدوف کننگ ءِ۔ دیوان اٹی بشخ ہلوک آایلو مہمان تیٹی ایس سی او نا سیکرٹری جنرل جانگ منگ، ڈائریکٹر ایگزیکٹیو کمیٹی ایس سی او ریجنل اینٹی ٹیررسٹ سٹرکچر رسلان مرزائیف، بورڈ آف ایس سی او بزنس کونسل نا چیئرمین عاطف اکرام شیخ و کونسل آف ایس سی او انٹربینک یونین نا چیئرمین مارات ییلی بائیف ئسک اوار ءُ۔ شنگھائی کمکار تنظیم نا باسک ملک آتا سروک حکومت نا کونسل نا دیوان اٹی زرگزران، واپار، چاگڑد وراجی و دودوربیدہ ئی رابطہ غاتا بشخ آتیٹی برجاکمکاری آ گپ وتران و تنظیم نا کارکڑد نا جاچ ءِ ہلنگک۔ شنگھائی کمکار تنظیم نا باسک ملک آتا راہشون تین پہ تینی کمکاری ءِ پین ودفنگ و تنظیم نا بجٹ نا منظوری کن اہم تنظیمی فیصلہ کیرہ۔
