اسلام آباد۔ 15 اکتوبر (اے پی پی) شنگھائی کمکار تنظیم (ایس سی او) نا باسک ملک آتا کونسل آف دی ہیڈز آف گورنمنٹ (سی ایچ جی) نا 23 می اِرادے ئی سروک دیوان سے شنبے نادے آ دارالحکومت اسلام آباداٹی بناکننگ ءِ، ہراٹی تنظیم نا باسک ملک آتا باسک و ایلو بٹنگوک ریاست آتا مندوبین تا پاکستان آ بننگ نا چرجوئی برجاءِ۔ بنجائی دارالحکومت نا جناح کنونشن سینٹر اٹی اڈ ہلوک آ حکومت نا سروک آتا دیوان نا کماشی ءِ وزیراعظم شہباز شریف کونسل نا ساڑی چیئرنا وڑاٹ کیک۔ پاکستان 26 اکتوبر 2023 آ کرغزستان نا دارالحکومت بشکیک اٹی مروک آ دیوان اٹی2023-24کن سربراہان حکومت نا کونسل (سی ایچ جی) نا چیئرنا وڑاٹ تینا زمواری تے سنبھالاسس۔ حکومت نا سروک آتا کونسل شنگھائی کمکار تنظیم نا تہہ ٹی ارٹ میکو بڑزکو انگا فورم ءِ، ہرانا بنداوی چکار راجی ، اقتصادی ، واپار و مالیاتی بشخ آتیٹی باسک ملک آتا نیام اٹ کمکاری ءِ مون آ دننگ آٹی ءِ، کونسل سال اٹی اسہ وار دیوان کیک تانکہ تنظیم نا تہہ ٹی کثیر جہتی کمکاری و اولیتی بشخ آتا حکومت عملی آ گپ وتران، اقتصادی و ایلو بشخ آتیٹی بنداوی و اہم ویل آتا تعین ءِ کننگ مرے و ایس سی او نا بجٹ ءِ منظور کننگ مرے۔ سروکی دیوان اٹی بشخ ہلوک آ شنگھائی کمکار تنظیم نا باسک ملک آتا سروک آتیٹی چین نا وزیراعظم و اسٹیٹ کونسل لی چیانگ، بیلاروس نا وزیراعظم رومن گولووچینکو، قزخستان نا وزیراعظم اولز ہاس بیکتانوف، روس انا وزیراعظم میخائل میشوسٹن، تاجکستان نا وزیراعظم کوہررسول زادہ، ازبکستان نا وزیراعظم عبداللہ عاریفوف، کرغزستان نا وزیر آتا کابینہ نا چیئرمین ظفروف عقیل بیک، ایران نا اول نائب صدر محمد رضاعارف و بھارت نا وزیرخارجہ سبرامنیم جے شنکر ئسک اوار ءُ۔ داکان بیدس منگولیا اسہ مبصر ریاست اسے نا وڑاٹ سروکی دیوان اٹی بشخ ہلنگ اٹی ءِ ہرانا نمائندگی ءِ وزیراعظم اویون اردین لویسنا مسرایی کننگ اٹی ءِ، ترکمانستان نا بطور مہمان خاص نمائندگی ترکمن وزیر آتا کابینہ نا نائب چیئرمین راشد مریدوف کننگ اٹی ءِ۔ دیوان اٹی بشخ ہلوک آ ایلو اہم شخصیت آتیٹی ایس سی او نا سیکرٹری جنرل ژانگ منگ، ڈائریکٹر ایگزیکٹیو کمیٹی ایس سی اوریجنل اینٹی ٹیررسٹ سٹرکچرر سلان مرزایوف، بورڈ آف ایس سی او بزنس کونسل نا چیئرمین عاطف اکرام شیخ و کونسل آف ایس سی او انٹربینک یونین نا چیئرمین مارات یلی باؤف ئسک اوار ءُ۔ وزیراعظم شہباز شریف سے شنبے نا بیگہ غا دود اٹی شریک شرفمند آمہمان تا اعزازاٹی بیابخیری سُوارہ اس ہم ایتک۔ علاقائی راہشون پگہ (چارشنبے) آ جناح کنونشن سینٹر اٹی زرگزران، واپار، چاگڑد، راجی و دودوربیدہ ئی رابطہ غاتا بشخ آتیٹی برجا کمکاری آ گپ وتران و تنظیم نا کارکڑد نا جاچ ءِ ہلیرہ۔ دیوان اٹی شنگھائی کمکار تنظیم نا باسک ملک آتا نیام اٹ کمکاریءِپین ودفنگ و تنظیم نا بجٹ نا منظوری کن اہم تنظیمی فیصلہ ہم کننگک۔ باضابطہ دیوان نا بناکننگ آن مست وزیراعظم محمد شہباز شریف سرکڑدہ غاتے بخیرکیک اوکان پد گروپ فوٹو سیشن مریک۔ دیوان اٹی شریک سرکڑدہ غاتا بیان تیان مست وزیراعظم شہباز شریف نا بنائی ہیت آتیان دیوان نا کارروائی بناکیک۔ دیوان اٹی شریک راہشون تا کنڈآن چندی دستاویز آتیا دستخط آن پد وزیراعظم ایسری ہیت آتے پیش کیک۔ نائب وزیراعظم و وزیرخارجہ اسحاق ڈار، ایس سی او نا سیکرٹری جنرل ژانگ منگ تون اِرادے ئی سروکی دیوان نا جھلکی و نتیجہ غاتیا گپ وتران کن میڈیا بیان ایتک۔ وزیراعظم شہباز شریف دیوان اٹی بشخ ہلوک آ راہشون تا اعزاز اٹی چارشنبے نادے آسرکاری دے انا اِرغ اس ہم ایتک۔ دفترخارجہ نا ترجمان ممتاز زہرہ بلوچ اسہ بیان اسے ٹی پارے کہ پاکستان نا کنڈآن شنگھائی کمکار تنظیم (ایس سی او) نا باسک ملک آتا سربراہان حکومت نا دیوان نا مہمانداری آن تنظیم نا مسخت و اصول آتیکن پاکستان نا آخبتی عزم انا عکاسی مننگ اٹی ءِ۔ 2017 ٹی شنگھائی کمکار تنظیم نا باسک مننگ آن پد آن پاکستان مدام تنظیم نا باسک و ہمسایہ ملک آتون تعلقداری تے سوگو کننگ کن آخبتی و تعمیری کاریم کرینے۔
