بنجائی وزیر حوالکاری عطاء اللہ تارڑ ایس سی او کانفرنس نا کوریج ءِ کروک آہندی و درملکی میڈیاکن میڈیا فیسلی ٹیشن سینٹر اسے نا بناءِ کرے

اسلام آباد۔14اکتوبر (اے پی پی) بنجائی وزیرحوالکاری و شینکاری عطاء اللہ تارڑ شنگھائی کمکار تنظیم سروک دیوان نا کوریج ءِ کروک آ ہندی و درملکی میڈیا کن میڈیا فیسلی ٹیشن سینٹر نا بناءِ کرے۔ بنانا وخت آ بنجائی سیکرٹری حوالکاری عنبرین جان ، پرنسپل انفارمیشن آفیسر (پی آئی او) مبشرحسن و وزارت حوالکاری نا ایلو بڑزکوآفیسر آک ہم ساڑی ئسر۔ بنجائی وزیر حوالکاری میڈیا فیسلی ٹیشن سینٹر اٹی بست وبند آتا جاچ ءِ ہلنگ کن چندی سیکشن آتا دورہ ءِ کرے۔ 15 و16 اکتوبر آ اڈ ہلوک آشنگھائی کمکار تنظیم سروک دیوان نا وخت آ ہندی و درملکی میڈیا نا نمائندہ میڈیا فیسلی ٹیشن سینٹر آن فائدہ ہرفرہ۔پاک چائنہ فرینڈ شپ سینٹر اٹی جوڑ میڈیا فیسلی ٹیشن سینٹر اٹی کمپیوٹرلیب، ہائی اسپیڈ انٹرنیٹ ، ڈیجیٹل پرنٹر، ڈیجیٹل سٹوڈیو، پوڈ کاسٹ سٹوڈیو، میڈیا لائبریری، کانفرنس تون تون اوار پوسکن آ آسراتی تے فراوان کننگانے۔ میڈیا فیسلی ٹیشن سینٹر اٹی پریس انفارمیشن ڈیپارٹمنٹ (پی آئی ڈی) نا کنڈآن پبی بست وبند کننگانے۔ ڈائریکٹوریٹ آف الیکٹرانک میڈیا اینڈ پبلی کیشنزنا کنڈآن میڈیا فیسلی ٹیشن سینٹراٹی ڈیجیٹل لائبریری اس ہم جوڑ کننگانے۔ میڈیا فیسلی ٹیشن سینٹر اٹی ہندی و درملکی صحافی تا آسراتی کن انفارمیشن ڈیسک اس ہم جوڑ کننگانے۔ ایس سی او کانفرنس اٹی میڈیا فیسلی ٹیشن سینٹراٹی ایس سی او کانفرنس نا کوریج ءِ کروک آ صحافی تیکن بیست ءُ چار گھنٹہ آسراتی دوئی مریک۔ داوخت آ بنجائی وزیر حوالکاری گچین بست وبند آتیا وزارت حوالکاری نا مچ آ ٹیم انا کوشست آتا ستاءِ کرے۔