چینی وزیراعظم لی چیانگ نا 11 سال آن پد دورہ ءِ پاکستان پاک چین سنگتی اٹی اہم ءُ مزل نا نشان اس مریک، صوبائی وزیر جان جوڑی بخت محمد کاکڑ نا اے پی پی تون گپ وتران

کوئٹہ۔ 14 اکتوبر (اے پی پی) صوبائی وزیر جان جوڑی بخت محمدکاکڑ چینی وزیراعظم لی چیانگ نا دورہ ءِپاکستان نا ستاءِ کرسا پارینےکہ شنگھائی کمکار تنظیم نا وخت آ چینی وزیراعظم نا دورہ ءِ اسلام آباد ہڑتوم آ ملک آتا سنگتی ٹی اہم مزل نا نشان اس مریک، گوادر انٹرنیشنل بالی پٹ نا ورچوئل بناآن دورہ نا اہمیت پین ہنداخہ ودانے۔ داہیت ءِ او دوشنبےنادے آایسوسی ایٹڈ پریس آف پاکستان تون گپ وتران کرساپارے۔ صوبائی وزیر جا ن جوڑی پارے کہ چینی وزیراعظم نا دورہ ءِ اسلام آباد نا وخت آ ہڑتوم آملک آتا نیام اٹ کانڑ کنی، واپار، کشت وکشار و ایلو بشخ آتیٹی مفاہمتی یات داشت آتیا دستخط مریک ہراڑآن ہڑتوم آ کنڈآتا دوستانہ تعلقداری ءِ پین مون آدننگک۔ اوپارےکہ پاک چین سنگتی خارجہ پالیسی نا اہم جزو ءِ، چینی وزیراعظم نا 11 سال آن پد دورہ ءِ پاکستان ہڑتوم آملک آتا سنگتی ٹی اہم مزل نا نشان مریک۔ صوبائی وزیر پارےکہ دورہ ٹی دوستانہ تین پہ تینی کمکاری نا پوسکن آ گمان تا جاچ ءِ ہلنگ تون اہم مفاہمتی یات داشت آتیا دستخط ہم مریک۔