شنگھائی کمکار تنظیم نا رکنیت آن پاکستان نا زرگزران ءِ جہانی زرگزران آتون مربوط کننگ نا وارخواہی دوئی مریک، اقتصادی چاہندار

اسلام آباد۔ 14 اکتوبر (اے پی پی) شنگھائی کمکار تنظیم نا رکنیت آن پاکستان نا زرگزران ءِ جہانی زرگزران تون مربوط کننگ، زرکاری ءِ ودفنگ و واپار نا مون آدننگ نا وارخواہی دوئی مریک، ہراڑآن ملک انا جم اقتصادی شونداری آ مثبت اثرتمنگ کیک۔ اقتصادی چاہندارآک پارینو کہ شنگھائی کمکار تنظیم(ایس سی او) نا باسک منگ و اونا دیوان تا مہمانداری ءِ کننگ پاکستان نا زرگزران آ کیہی مثبت اثرمرتب کننگ کیک۔ ایس سی او اہم علاقائی تنظیم ءِ ہرانا باسک ملک آتیٹی چین، روس، بھارت و نیامی ایشیائی ریاست آک اوار ءُ، ہرا جہانی زرگزران تیٹی بھلو کڑد اس اد اکیک۔ داتنظیم نا پلیٹ فارم آن پاکستان نا زرگزران ءِ کیہی فائدہ دوئی مننگ کیک۔ ایس سی او نا کمک اٹ پاکستان ءِ چین، روس، و ایلو باسک ملک آتون زرکاری نا پوسکن وارخواہی ملنگ کیک۔ خاص وڑاٹ چین نا کنڈآن پاکستان اٹی زرکاری ءِ ودفنگ نا گمان مریک ، انتئے کہ ہڑتوم آ ملک آک مہالو آن ہی اقتصادی راہداری (سی پیک) نا رداٹ کاریم کننگ اٹی ءُ۔ اقتصادی چاہندار آک پاریر کہ ایس سی او نا باسک ملک آتون واپاری تعلقداری تے مون آ دننگ آن پاکستان نا برآمد آتیٹی ودکی مننگ کیک، ہراڑآن ملکی زرمبادلہ ٹی گچینی بریک۔ پاکستان ءِ نیامی ایشیائی ملک آتسکان رسینگ دوئی مریک، ہرا توانائی و معدنیات نا وسیلہ غاتیان شپ ءِ۔ ایس سی او نا پلیٹ فارم آ توانائی نا بشخ اٹی کمکاری ءِ مون آدننگ مریک، دُن کہ گیس و تیل انا معاہدہ ہرافتیان پاکستان نا توانائی نا گرج آتے پورو کننگ اٹ کمک رسینگک۔ اوپارےکہ ایس سی او نا کمک اٹ پاکستا ن ءِ علاقائی رابطہ غاتاڈٹ آتیٹی بشخ ہلنگ نا موقع ملک، دُن کہ سڑک، ریلوے و بندرگاہ تا تفنگ۔ دا ڈٹ آک واپاری ہن وبر ءِ آسان کننگ کیرہ و علاقائی واپار اٹی ودکی کننگ کیرہ۔