ایس سی او نا وخت آ چینی وزیراعظم نا دورہ ءِ پاکستان ہڑتوم آملک آتا نیام اٹ سوگو تعلقداری نا اہم نشانی ءِ، پلاننگ کمیشن

اسلام آباد۔14اکتوبر (اے پی پی) چین نا وزیراعظم نا یانزدہ سال آن پد شنگھائی کمکارتنظیم ناوخت آ پاکستان نادورہ ہڑتوم آملک آتا نیام اٹ سوگو تعلقداری نا اسہ اہم ءُ نشانی اسے ،دا دورہ پاکستان و چین نا تین پہ تینی تعلقداری تے پین مون آ دننگ و چندی بشخ آتیٹی کمکاری ءِ ودفنگ ناوارخواہی فراوان کیک۔ پلاننگ کمیشن کمامدارآتا رداٹ چین ناوزیراعظم یانزدہ سال آن پد پاکستان نا دورہ ءِ کیک و پاکستان چین نا تین پہ تینی  تعلقداری آ گپ وتران کیک۔ داکا ن مست چین نا وزیراعظم 2013ٹی پاکستان نا دورہ ءِ کریسس۔ دادورہ ٹی کیہی اہم امور آتیا گپ وتران، اقتصادی کمکاری و ہڑتوم آملک آتا نیام اٹ اقتصادی راہداری (سی پیک) نا رداٹ برجا ڈٹ آتا جاچ ءِ ہلنگک۔ واپار و زرکاری ، واپاری تعلقداری تے پین ودفنگ و چین نا کنڈآن پاکستان اٹ زرکاری نا پوسکن ءُ وارخواہی ودی کننگ آ گپ وتران کننگک تانکہ ہڑتوم آ زرگزران تے فائدہ رسینگے۔ تعلیمی ، سائنسی و دودوربیدہ ئی بشخ آتیٹی کمکاری ءِ ودفنگ کن معاہدہ ہم گمانی ءِ ہرا السی کہول آ ہڑتوم آملک آتا تعلقداری تے پین سوگو کننگ اٹ کمکار پک مریک۔ چینی وزیراعظم نا دادورہ ہڑتوم آملک آتا نیام اٹ متکن آ دوستانہ تعلقداری تے اسہ پوسکن ءُ جہت اس تننگ و ہڑتوم آملک آتا نیام اٹ سٹریٹجک شریداری ءِ پین سوگو کننگ نا اسہ اہم ءُ موقع اسے۔