اسلام آباد۔ 10 جولائی (اے پی پی) وزیراعظم محمد شہباز شریف محرم الحرام اٹی امن و ایمنی کن صوبہ غاتون مربوط رابطہ برقرارتخنگ نا پارت کرسا پارینے کہ سیکورٹی باندات آتیٹی کمکاری آن قومی سیوت و یکجہتی ءِ سوگوی ملک، زرگزرانی ہدف آتا دوئی کننگ کن شفافیت و خوداحتسابی نا گرج ءِ، زرگزران نا سمت ءِ سہی کننگ کن سخت ءُ فیصلہ واصلاحات کروئی مریک، ڈاؤن سائزنگ و رائٹ سائزنگ نا کاریم اٹی سستی و تاخیری چم آتے سگنگ پننگک، پی ڈبلیو ڈی ءِ چٹفنگ آن انکار ءِ ہچ ءُ حالیت اسے ٹی منپنہ، چین اتون کمکاری ءِ مون آ دننگ آ ترندی اٹ پیش رفت ءِ پک کروئی مریک، روس انا صدر تون اوڑدہی ٹی واپاری وزرکاری رابطہ غاتا مون آ دننگ آ جوان گپ وتران مس، ٹیوب ویل آتا شمسی توانائی آ گدریفنگ آن نہادی زرمبادلہ نا بچت مریک ، مچ آملک اٹی تیل آن چلینگوک آ 10 لکھ ٹیوب ویل آتے شمسی توانائی آ گدریفنگک، غٹ وزارت آتے کارکڑد گچین کروئی مریک۔ داخیال آتا درشانی ءِ او چارشنبے نادے آ بنجائی کابینہ نا دیوان اٹی گپ وتران کرساکرے۔ وزیراعظم پارے کہ درو خیبرپختونخواٹی وزیرستان اٹی شہیدی مسنے۔ کراچی ٹی سی ٹی ڈی نا ڈی ایس پی ءِ ہم شہید کننگا۔ اونا درجہ غاتا بڑزی کن دعا کینہ و شہید آتا خاہوت تون ہڑزخواہی کینہ۔ وزیراعظم پارے کہ محرم الحرام اٹی وزارت داخلہ و صوبہ و ایلو تعلقدار ادارہ غاتا نیام اٹ مربوط رابطہ بایدے مرے۔ صوبہ غاتے بنجانا کنڈآن انت کہ کمک اس درکارمرے اوفتے دمدستی فراوان کننگے۔ ہندا وڑ آزاد کشمیر و گلگت بلتستان نا حکومت آتون ہم خڑکی رابطہ تخنگے۔ سیکورٹی باندات آتیٹی کمکاری اٹ قومی یکجہتی و سیوت ءِ سوگوی ملک۔ وزیراعظم پارے کہ او تاجکستان نا دورہ ءِ کرے و ولدا شنگھائی کمکار تنظیم نا سروک دیوان اٹی بشخ ہلک۔ چندی ملک آتا سروک آتون جوان اوڑدہی مس۔ روسی صدر پیوٹن تون واپاری و زرکاری رابطہ غاتا مو ن آ دننگ کن جوان گپ وتران مس و دابابت عملدرآمد کن بنجائی وزیر ڈٹ بندی احسن اقبال نا کماشی ٹی اسہ کمیٹی اس جوڑ کننگانے۔ دورہ ءِ چین آن پداہم بشخ آتیٹی مستی کمکاری کن حوال ہلکونن۔ غٹ وزارت آتے چین اتون چندی بشخ آتیٹی کمکاری کن پبی تیاری و گام گیج کننگے۔ وزیراعظم پارے کہ دا ملک و پاکستان نا وسیلہ غاتا باندات ءِ۔ نن ملک ءِ مون آ درسا ہنوئی ءِ۔ چین اتون کمکاری ءِ مون آ دننگ ترندی اٹ پیش رفت ءِ پک کروئی مریک۔ وزیراعظم پارے کہ بلوچستان اٹی 28 ہزار ٹیوب آتے شمسی توانائی آ گدریفنگ نا فیصلہ کننگانے۔ وزارت خزانہ ، وزارت پاور ڈویژن و وزارت کانود نا کمامدارو وزیراعلیٰ بلوچستان داڑکن بھاز کاریم کرینے۔ وزیراعلیٰ بلوچستان نا ویل آتا ایسری کن سنجیدگی نا درشانی سفت نا قابل ءِ ۔ ٹیوب ویل آتیکن بنجانا کنڈآن تروک آ 80 ارب روپئیی زیان مسکہ، نن اسہ بھاز بھلو ریسہ اس طے کرین۔ داڑکن وزارت خزانہ ، وزارت پاور ڈویژن وبلوچستان نا حکومت و خاص کر وزیراعلیٰ بلوچستان ءِ خراج تحسین پیش کیوہ۔ اوبھاز جوان وڑاٹ دا باندات ءِ مون آ دننگ کن کاریم کرے۔ وزیراعظم پارے کہ ملک اٹی 10 لکھ ٹیوب ویل تیل آ چلینگ انگ ءُ و نن سالانہ مسہ نیم ارب ڈالر نا تیل درآمد کینہ، مچ آملک اٹی تیل آن چلینگوک آ 10 لکھ ٹیوب ویل آتے شمسی توانائی آ گدریفنگک، داڑکن اسہ بزنس ماڈل اس جوڑ کننگ و صوبہ غاتون خڑکی رابطہ نا گرج ءِ۔ بلوچستان اٹی 28ہزار ٹیوب ویل آتا شمسی توانائی آ گدریفنگ اسہ اہم ءُ گام اسے۔ وزیراعلیٰ بلوچستان و بنجانا تعلقدار آفیسر آک خواری اٹ کاریم کریر۔ وزیراعظم پارے کہ ٹیوب ویل آتا شمسی توانائی آ گدریفنگ آن نہادی زرمبادلہ نا بچت مریک و بزغرآتے اڑزان بجلی ملک۔ بجلی نا ٹرانسمیشن لائن تے جوان کننگ و بجلی دُزی نا مون ءِ توننگ نا گرج ءِ۔ شمسی توانائی آن ودی مروک آ اڑزان بجلی نا فائدہ کشت وکشار وکشارگر مریک و کشاری بشخ ترندی اٹ شون ہلیک۔ وزیراعظم پارے کہ پاکستان اٹ معدنیات نابے پناہ کوڑی ساڑی ءِ ہرافتیان فائدہ ہرفوئی مریک۔ وخت ترندی اتون گدرینگ انگ ءِ، زرگزرانی گچینی کن پبی گام گیج آتا گرج ءِ۔ وزیراعظم پارے کہ ڈاؤن سائزنگ و رائٹ سائزنگ آ کاریم مننگ ءِ، اگہ وزارت اس داٹی سستی نا درشانی ءِ کرے وتاخیری چم آتے کاریم اٹ ایس تو اودے سگنگ پننگک۔ وزیراعظم شہباز شریف پارے کہ پاکستان نیشنل شپنگ کارپوریشن تون 10 آن 12 بحری جہاز ءُ ولے تنخواک 500 ارب روپئی ءُ و 5 ارب ڈالر ملک سالانہ بحری جہاز آتا کِرا نامدا ٹی اداکیک۔ کراچی بندرگاہ غا مروک آ کرپشن ءِ توننگ نا گام گیج کروئی مریک، کراچی بندرگاہ ٹی 1200 ارب روپئی نا دُزی مننگ ءِ ، داپیسہ تو شونداری ڈٹ داسو و دیامربھاشا ڈیم ڈٹ آتیا خڑچ مننگ کیرہ۔ کرپشن نا تورسا وسیلہ غاتے الس نا آسودہی آ خڑچ کینہ۔ بنگلہ دیش و ہندوستان تون ننے آن کیہی ہنداخہ زیات بحری جہاز ءُ۔ زرگزرانی ہدف آتا دوئی کننگ کن شفافیت و خوداحتسابی نا گرج ءِ۔ وزیراعظم پارے کہ ریئل اسٹیٹ نا بشخ آ خراج آتیان 100 ارب روپئی نا دوئی نا گمان ءِ۔ اوپارے کہ دامننگ کپک کہ بیرہ تنخواہ دار تپہ غا خراج خلنگے و ایلو ہموبشخ آتے اِلن ہرا خراج تننگ نا وس تخرہ۔ اوپارے کہ ننے خرین ءُ فیصلہ کروئی تمک و پنجرجاتی اصلاحات کروئی مریک، اومیت ءِ کہ آئی ایم ایف نا گمانی پروگرام پاکستان نا آخیریکو پروگرام مریک ، آئی ایم ایف آن نجات نا ہدف اٹی بیرہ ہیت آتے اٹ دوئی مفک، آئی ایم ایف آن نجات نا ہدف نا دوئی قربانی و ایثار اٹ ممکن ءِ۔ اوپارے کہ نیزگار و نادار تپہ نا مشکل آتا جوانی اٹ درک ءِ، کرپشن نا چٹفنگ و ایلو گچین انتظامی گام گیج آتا کمک اٹ ملکی وسیلہ غاتیٹی ودکی کننگک، نیزگار تپہ ءِ ریلیف نا فراوانی کن بنجاشونداری بجٹ آن 50 ارب روپئی نا بست وبند کرینے، مسہ تُو اکن بجلی صارف آتے ریلیف تننگک ولے داوخت اٹی ودکی مالی وسیلہ غاتا بست وبند کروئی مریک، ننے دے و نن ءِ اسٹ کرسا زرگزرانی گام گیج آتے بھرمی کروئی ءِ۔ وزیراعظم پارے کہ ملک اٹی بجلی فاضل ءِ ولے لوڈشیڈنگ ہموعلاقہ غاتیٹی مننگءِ ہراڑے بجلی دُزی مریک، خڑچ آتیٹی کمتی کن ڈاؤن سائزنگ و رائٹ سائزنگ نا تینٹ چاروکی ءِ کننگ اُٹ ، پی ڈبلیو ڈی نا بندش نا فیصلہ آ عملدرآمد اٹی تاخیر ءِ سگنگ پننگک داڑکن 2 ہفتہ تننگاسس او پورو مسنو، ننے دا دے پورو بند کروئی ءِ و دابابت گیگ بدل سسٹم نا ہم بست وبند ءِ کرینن، پنجاب نا ماڈل آ عمل کننگک۔ وزیراعظم پارے کہ ننے کفایت شعاری ءِ تینا کروئی مریک، قوم نتیجہ خواہک، وزیر واپار برآمد آتے 60 ارب ڈالر اسکان دننگ کن پلان اس تیارکے، پاکستان نا شونداری و شونہالی کن ننے زرگزرانی چیلنج آتا مون ءِ تورسا مون آہنوئی ءِ، غٹ وزارت آتے تینا کارکڑد ءِ پین گچین کروئی مریک۔
