اسلام آباد۔10جولائی (اے پی پی): بنجاھی کابینہ ءَ وزارت ہاوسنگ اینڈ ورکس ءِ سپارش ءِ پد ءَ پاکستان پبلک ورکس ڈیپارٹمنٹ ءَ را ھلاس کنگ ءِ کار رپک ءِ منظوری داتگ وھدیکہ کابینہ ءَ را گوشگ بوتگ کہ انفارمیشن ٹیکنالوجی، کشمیر ءُ گلگت بلتستان ، ریاست ءُ سیم سرئی کار، صنعت ءُپیداوار ءُراجی جان سلامتی ءِ وزارت آنی گیر ضلوریگیں جھلی ادارگ آنا ں بند کنگ ءُ ضلوریگیں ادارگ آنی رائٹ سائزنگ ءِ ھوالگ ءَ بنیاتی مالومداری ءِ در جنگ ءِکار 12 جولائی ءَ تاں سرجم کنگ بیت۔ ھمے رنگ ءَ 19 جولائی ءَ چہ بنجاھی حکومت آنی ایندگر وزارت آں چہ اے نمونگ ءِ مالومداری در جنان ءَ ایندگر ادارگ آناں بند یا ھوار کنگ ءِ سپارش رد ءُ بند کنگ بنت۔ مزن وزیر کارگس ءِ میڈیا ونگ ءِ نیمگ ءَ جاڑیں بوتگیں پریس ریلیز ءِ رد ءَ مزن وزیر محمد شہباز شریف ءِ سروکی ءَ بنجاھی کابینہ ءِ دیوان چار شمبے ءَ برجم بوت۔ بنجاھی کابینہ ءَ وزارت ہاوسنگ اینڈ ورکس ءِ سپارش ءِ پد ءَ پاکستان پبلک ورکس ڈیپارٹمنٹ ءَ را ھلاس کنگ ءِ کار ءِ منظوری داتگ۔ منظور کتگیں کار رپک آنی رد ءَ بنجاھی دیمروئی منصوبگ آنی نگرانی ءِ واستہ پاکستان انفراسٹرکچر ڈویلپمنٹ کمپنی جوڑ کنگ بیت وھدیکہ بنجاھی حکومت ءِ نگرانی ءَ صوبائی نمونگ ءِ توامیں دیمروئی منصوبگ آناں سیادی داروکیں صوبائی ادارگ آنی ھوالگ ءَ کنگ بیت۔ ھمے وڑ ءَ پاک پی ڈبلیو ڈی ءَ را گیشینتگیں چار ءُ گزار ءُ مرمت ءِ کار آناں جاڑی دارگ ءِ واستہ ایسیٹ اینڈ فیسلیٹی منیجمنٹ کپنی ءِ جوڑیشت کنگ بیت۔ پاک پی ڈیلیو ڈی ءِ کارکنوک آنی درجہ بندی ءَ چہ پد سیادی داروکیں وزارت آنی شفٹنگ کنگ بیت ءُ گولڈن ہینڈ شیک سکیم جوڑ کنگ بیت۔ ملک ءَ پاک پی ڈبلیو ڈی ءِ توامیں ماڑی آنی ریکاٹ ءَ را کمپیوٹرائزیشن کنگ بیت۔ کابینہ ءَ پنت ءُشون کت کہ ٹرانزیشن ءِ اے کار دو ہفتگ آنی اندر اندر ءَ سرجم کنگ بیت۔ کابینہءَ را وزیر ھزانگ ءِ سروکی ءَ حکومتی کاس ءَ را کم کنگ ءِھوالگ ءَ جوڑ کتگیں کمیٹی ءِانوگ ءَ تاں دیمروئی آنی ھوالگ ءَ بریفنگ دیگ بوتگ۔ بریفنگ ءَ گوشگ بوتگ کہ انفارمیشن ٹیکنالوجی، کشمیر ءُ گلگت بلتستان ، ریاست ءُ سیم سر آنی کار، صنعت ءُ پیداوار ءُ راجی جان سلامتی ءِ وزارت آنی گیر ضلوریگیں جھلی ادارگ آںان بند کنگ ءُ المیگیں ادارگ آنی رائٹ سائزنگ ءِ ھوالگ ءَ چہ بنیاتی مالومداری در جنگ بوھگ ءَ انت، اے کار 12 جولائی ءَ تاں سرجم بیت۔ کمیٹی ا ے مالومداری آنی رد ءَ سیادی داروکیں وزارت آنی شور ءُ مشور ءَ چہ رد ءُ بند کنان ءَ کابینہ ءَ را اگست ءِ اولی ہفتگ ءَ پیش کنت۔ ھمے وڑ ءَ 19 جولائی ءَ چہ بنجاھی حکومت ءِ ایندگر وزارت آں چہ اے نمونگ ءِ مالومداری در جنان ءَ ایندگر اداگ آناں بند یا ھوار کنگ ءِ سپارش رد ءُ بند کنگ بیت۔ کابینہ ءَ ملک ءَکانودی رنگ ءَ نندوکیں 1.45 ملین اوگان لڈ ءُ بار کنوک ھما کہ پروف آف رجسٹریشن کاٹ ءِ وھدءُ پاس 30 جون 2024 ءَ ھلاس بوتگ انت، آوانی پی او آر کاٹ ءِ رد ءَیک سال بزاں 39 جون 2025 ءَ تاں رمس ءِ منظوری داتگ۔ بنجاھی کابینہ ءَوزارت ہاوسنگ اینڈ ورکس ءِ سپارش ءِ سر ءَ پشاور ءَفیڈرل لاج نمبر II ماڑی ءَ را کارگس ءِ رنگ ءَ کارمرزی ءِ واستہ الیکشن کمیشن آف پاکستان ءَ را شفٹ کنگ ءِ منظوری داتگ۔ اے ماڑی ءَ صوبائی الیکشن کمیشنر ءِ کارگس جوڑ کنگ بہ بیت۔ بنجاھی کابینہ ءَ وزارت ءِ کانود ءُ انصاف ءِ سپارش ءِ پد ءَ ملک ءَ جتا جتائیں شہر آنی تہءَ اپیلٹ ٹربیونل ان لینڈ ریونیو ءِ بینچ آں چہ 7 اکاونٹ ممبر آناں واپس ایف بی آر ءَ روان داتگ ءُ وزارت ءِ نیمگ ءَ چہ نامینتگیں 14 اپسرگ آناں اپیلٹ ٹربیونل انلینڈ ریونیو ءِ بینچ ءِ سر ءَ پوسٹ کنگ ءِ منظوری داتگ۔ بنجاھی کابینہ ءَوزارت جان سلامتی ءِ سپارش ءِ پد ءَ جوائنٹ سیکرٹری محمد اقبال ءَ را بطور بست ءُ بند کنوک نیشنل کاؤنسل فار ہومیوپیتھی پوسٹ کنگ ءِ منظوری داتگ۔ بنجاھی کابینہ ءَ وزات راجی جان سلامتی ءِ سپارش ءِ پد ءَپاکستان میڈیکل اینڈ ڈینٹل کونسل ءِ کوالٹی ءِ وڑ ءِ بوھگ ءِ پد ءِ بہاولپور میڈیکل کالج ءِ 19 اپریل 2024 ءَ چہ تسلیم بوتگیں بستار ءَ را ھلاس کنگ ءِ منظوری داتگ۔ اے ادار گ ءَ وانوکیں نودربر آناں ملک ءِ ایندگر میڈیکل کالجز آنی تہءَ روان دیگ بیت۔ مزن وزیر ءَ گوشت کہ جوان نہ بوھگ ءَ ابید بہاولپور ءَ میڈیکل کالج ءَ را پی ایم ڈی سی ءَ زانت ءُ زانشی چست ءُ ایر آناں برجا دارگ ءِ اجاز چتور داتگ۔ مزن وزیر ءَ پرائم منسٹر انسپکشن کمیشن ءَ را پٹ ءُ پول کنگ ءِ حکم ھم داتگ۔ مزن وزیر ءَ پی ایم ڈی سی ءِ جیڈھ آنی ھوالگ ءَ بنجاھی وزیر برائے اقتصادی کار احد خان چیمہ ، ڈپٹی پلاننگ کمیشن ڈاکٹر جہانزیب خان ءُ مزن وزیر ءِ کوآرڈینیٹر برائے جان سلامتی ملک مختار احمد بھرتھ ءِ ھواریں ئ۔ کمیٹی ءِ جوڑ کت ءُ ایشاناں پنت ءُ شون کت کہ پی ایم ڈی سی ءِ تھر ڈ پارٹی آڈٹ ءِ ھوالگ ءَ شور ءُ مشور کابینہ ءِ آیوکیں دیوان ءَ پیش کنگ بہ بنت۔ بنجاھی وزارت جان سلامتی ءِ سپارش ءَ چہ ڈرگ ریگولیٹری اتھارٹی آف پاکستان ءِ اشتہار آنی ھوالگ ءَ کمیٹی ءِ 17 ھپدھمی ءُ ھژدھمی دیونا ءَ دوا ءُ درما 53 اشتہار آناں ٹی وی، ریڈیو ءُ ھالتاک آنی تہءَ اشتہار دیگ ءِ منظوری داتگ۔ بنجاھی کابینہ ءَکے الیکٹرک ءِ بورڈ آف ڈائریکٹر آنی تہءَ حکومت پاکستان ءِ نیمگ ءَ چہ جاوید قریشی ءَ را ڈائریکٹر پوسٹ کنگ ءِ منظوری داتگ۔ مزن وزیرءَ پنت ءُ شون کت کہ توامیں ریاستی ادارگ آنی مھتلیں ءُ ناسرجمیں بورڈ آف ڈائریکٹرز آنی دو ہفتگ آنی تہءَ کزبی ءُ جوانیں نامداریں بستا ر ءِ مردم آنی پوسٹنگ کنگ ءُایشاں ایکٹو کنگ بہ بیت۔ بنجاھی کابینہ ءَ اقتصادی رابطہ کمیٹی ءِ 27 جون 2024 ءَ بوھوکیں دیودان ءَ زرتگیں پیسلہ آنی منظوری داتگ۔ بنجاھی کابینہ ءَ سرکاری ملکیتی ادارگ آئی ھوالگ ءَ کابینہ کمیٹی ءِ 4 جولائی 2024 ءَ بوھوکیں دیوان ءَ زرتگیں پیسلہ آنی منظوری دات۔
